O 25% dos nenos galegos ve a televisión en horario de adultos

|

Niostele


A franxa de "maior audiencia" de nenos en Galicia vai "desde as 20,30 horas ata a medianoite", cando un de cada catro menores de entre 4 e 12 anos está sentado fronte á televisión, tal e como revelou este martes o director xeral da CRTVG, Alfonso Sánchez Izquierdo.


"Consomen máis produtos audiovisuais para adultos que para nenos da súa idade", salientou en comisión parlamentaria, en resposta a unha pregunta da deputada de En Marea Paula Vázquez Verao sobre a programación infantil e xuvenil nos medios públicos galegos.


Así pois, a pesar de admitir que os contidos específicos na TVG poidan ser "mellorables", xulgou "preocupante" que os nenos vexan a televisión en horario de adultos. Ademais, apuntou que é "francamente difícil" deseñar unha oferta "adaptada a estes hábitos de consumo" dos mozos.


Máis aló deste extremo, Sánchez Izquierdo achegou informes de audiometría que constatan que en Galicia hai 202.000 persoas entre 4 e 12 anos e 261.000 entre 13 e 24, e que quen consome televisión son 19.000 na primeira franxa de idade e 22.000 na segunda. En canto aos que ven a TVG, son uns mil en cada un deses grupos.


É por iso que á marxe de os 1,8 millóns de euros que os medios públicos galegos destinan á programación infantil e xuvenil (que ocupa unhas 70 horas á semana), a estratexia pasa por adaptarse a unha xeración que xa ten máis tabletas que televisións, segundo apuntou Sánchez Izquierdo.


PROMOCIÓN DO 'XABARÍN CLUB'


Finalmente, ante a insistencia de Vázquez Verao na promoción do 'Xabarín Club' tamén para fomentar o uso do galego entre os máis pequenos, o director xeral explicou que as iniciativas neste sentido non deron "os resultados esperados".


"Nosa percepción", indicou, é que "a vinculación emocional" con ese formato dáse en xeracións de mozos anteriores, pero xa non na actual, "máis identificada con outro tipo de personaxes".

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial Publicidade
Powered by Bigpress