Guindos ve "sen dúbida" garantidos os empregos de PSA-Opel en España

|


DeGuindos2 1

O ministro de Economía, Industria e Competitividade, Luís de Guindos, afirmou este martes que "sen dúbida" estarán garantidos os aproximadamente 13.000 empregos de PSA e Opel en España tras a operación de compra da primeira pola segunda por 2.200 millóns, se se mantén a "eficiencia, produtividade e competitividade" das plantas españolas.


En declaracións aos xornalistas tras participar nun almorzo-coloquio organizado pola Cámara de Comercio de EEUU en España, De Guindos detallou que o Goberno mantivo contactos "a todos os niveis" tras o anuncio de compra de Opel por PSA, xa que o presidente do Goberno, Mariano Rajoy, estivo en contacto co presidente de PSA, Carlos Tavares, e el mesmo co secretario xeral.


"Pasáronnos unha mensaxe de tranquilidade, de que as fábricas en España son produtivas", apuntou de Guindos, en referencia á planta de Opel en Figueruelas (Zaragoza) e as de PSA en Galicia e Madrid.


De Guindos subliñou que o principal "elemento de tranquilidade" é que España se converteu no "principal país" para a nova compañía xurdida tras a integración de PSA con Opel, e os investimentos son "produtivos".


CONDICIÓNS DO PERSOAL


A CIG, tras consumarse a operación de compra de Opel por parte de PSA Peugeot Citroën, defendeu que os recursos do grupo "deben ser utilizados para seguir mellorando" tanto na dirección estratéxica, "como pode ser o rescate de Opel", como na mellora das condicións laborais dos traballadores.


Nun comunicado remitido este martes, o sindicato manifestou que, aínda que "comparte" que a multinacional francesa teña unha situación económica saneada, iso "non quere dicir que o presidente se obceque en ser un campión europeo do automóbil sen reparar nos danos colaterais que iso pode supoñer para os traballadores de plantas produtivas".


Así as cousas, criticou que o presidente do grupo fale de "mellora" deixando "totalmente á marxe a degradación salarial e social dos traballadores", e, a continuación, remarcou que é necesario que "comece un novo camiño onde o rescate de postos de traballo, salarios, estabilidade nos horarios, saúde, dereitos, etc., se vexa plasmado na realidade".


MENSAXE DE TRANQUILIDADE


Segundo comunicaron fontes sindicais a Europa Press, este luns a dirección da planta de PSA en Vigo trasladou aos representantes dos traballadores unha mensaxe de "tranquilidade" tras consumarse a operación de compra de Opel, e garantiu o mantemento dos "compromisos" adquiridos co persoal en materia laboral e salarial.


Con todo, os representantes sindicais expresaron que "quedan algunhas incertezas" por despexar, por exemplo, a adaptación das factorías de Opel ao plan de competitividade de PSA, "que vai pasar coas duplicidades", e "que vai pasar con todas as plantas en Europa".

relacionada PSA, o maior produtor e vendedor de vehículos de España tras a compra de Opel
relacionada PSA Peugeot Citroën pecha un acordo para comprar Opel

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress