O Celta empata en inferioridade ante o Espanyol

O Celta sumou un punto tras asinar un gran encontro ante o Espanyol. Fíxoo ademais cun home menos, desde o minuto 43, pola expulsión de Andreu Fontàs. Os goles chegaron un tras outro no primeiro tempo, coma se celestes e pericos se replicaran os uns aos outros. En catro minutos marcáronse tres goles. A segunda parte foi outro cantar. A dobre amarela a Fontàs foi determinante e as ocasións escasearon. O marcador non se moveu: 2-2.

O partido empezou de ti a ti, sen un claro dominador, pero tras a primeira ocasión, en botas de Jonny no minuto 14, o Celta deu un paso á fronte e fíxose dono do balón. Iago Aspas abriu o marcador cun lanzamento de falta directa. O Espanyol non se cruzou de brazos e respondeu pouco despois co gol do empate, obra de Gerard a saque de esquina no minuto 28.

Foi entón cando se desatou a tolemia sobre o céspede. Tres minutos despois do tanto perico Wass puxo de novo os celestes por diante cun golazo. Recibiu o esférico, avanzou cara á portería e, desde fóra da área, enviou un mísil que se coou practicamente pola escadra. Case non houbo tempo para as celebracións. O Espanyol igualou de novo o resultado apenas dous minutos despois, á contra, cunha diana de Piatti.

O Celta seguiu apertando e tivo máis ocasións, a mellor en botas de Sisto, quen enviou o balón ao poste. Ao fío do descanso, unha expulsión rompeu o partido, Fontàs tocou o balón coa man e o árbitro ensinoulle a cartolina.

A vermella ao central catalán cambiou por completo o partido. Se a primeira parte foi un frenético espectáculo, a segunda apenas tivo ocasións. O Espanyol controlou o balón, pero foi o Celta o que, a pesar de estar en inferioridade, protagonizou as mellores chegadas. Non se moveu o marcador e os vigueses sumaron un punto.

FICHA TÉCNICA

2-CELTA: Rubén, Hugo Mallo, Cabral, Fontàs, Jonny, Marcelo Díaz, Radoja (Pape, min.88), Wass, Iago Aspas, Sisto (Jozabed, min.78), Guidetti (Sergi Gómez, min.46).

2-ESPANYOL: Diego López, M. Navarro (Javi López, min.15), Ó. Duarte, D. Reyes, Aarón, Fuego (Jurado, min.54), David López, Piatti (Reyes, min.85), Hernán, Gerard, Caicedo.

Goles: Iago Aspas, 1-0, min.21; Gerard, 1-1, min.28; Wass, 2-1, min.30; Piatti, 2-2, min.32.