Martiño Noriega abordará con Feijóo este venres a taxa turística de Santiago

|

Martionoriegafeijoo


A proposta de creación dunha taxa turística, o incremento da partida da Capitalidade e o estado de infraestruturas pendentes en Santiago de Compostela son tres dos temas que centrarán, a petición do rexedor da cidade, Martiño Noriega, o encontro que manterá co presidente da Xunta, Alberto Núñez Feijóo, este venres.


Fontes do Consistorio compostelán ratificaron que o alcalde prevé levar estes tres asuntos á que será a terceira reunión institucional que mantén co presidente galego e que terá lugar ás 11,30 horas na Xunta.


Este encontro encádrase na rolda de contactos que Feijóo está a manter cos alcaldes das cidades galegas. Este venres 3 de marzo será a quenda do rexedor compostelán logo de que a entrevista se pospuxese debido á recente paternidade do presidente galego.


Á marxe da creación da taxa turística, o alcalde xa avanzara a semana pasada que a intención do goberno local é conseguir aumentar a contía da partida de Capitalidade, que actualmente "supera lixeiramente os 2 millóns de euros".


Esta axuda é concedida polo Goberno galego para paliar parte dos gastos que supón para a cidade ser a capital de Galicia e que, segundo algúns estudos, superan os cinco millóns.


INFRAESTRUTURAS PENDENTES


Noriega tamén preguntará polo estado de infraestruturas pendentes como a construción da variante de Aradas, a execución do acondicionamento dunha zona do Monte do Gozo e "cuestións compartidas" entre Xunta e goberno local, como a ligazón da AP-9 e a "conexión norte" desta autoestrada.


O encontro entre Feijóo e Noriega servirá, segundo este último, para "poñer ao día o grao de execucións das obras en marcha" e enmárcase dentro do "clima positivo" que manteñen Concello de Santiago e Xunta de Galicia tras o fin do "período de eleccións" do último ano e medio.

relacionada Noriega confía en que "ninguén deixa de visitar" Santiago por unha taxa turística
relacionada Feijóo, sobre a taxa turística en Santiago: "Un debate respectable, pero improvisado"

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress