Viaqua xestionará os interceptores da marxe dereita da ría de Ferrol

A empresa de xestión da auga Viaqua resultou gañadora do concurso convocado por ACUAES (Sociedad Estatal Aguas de las Cuencas de España SA) para xestionar os interceptores xerais da marxe dereita da ría de Ferrol.

Tal e como informa a compañía nun comunicado, estas instalacións "están concibidas para recoller a totalidade de vertidos dos municipios de Ferrol e Narón, que na actualidade se derivan á ría e ríos que desembocan nela". Unha vez recollidos, conduciranos ao interceptor xeral para seren enviados á depuradora.

Con este contrato, a empresa xestionará "un total de 12 tanques de tormenta, cun volume acumulado de 26.410 metros cúbicos, asociado ás instalacións de desbaste, bombeos de auga residual, impulsións, aliviadoiros, instrumentación, automatización e telecontrol".

Viaqua informa de que tamén se ocupará do interceptor xeral que atravesa Ferrol e Narón, "recollendo as augas dos tanques de tormenta para conducilas ao bombeo da Malata, así como dos 20 quilómetros dos subtramos asociados a cada un dos tanques".