O alcalde de Marinaleda apadriña en Ferrol o nacemento da Plataforma Social Galega
Jorge Suárez recibe "nun acto oficial" a Sánchez Gordillo. Boa parte dos integrantes deste novo colectivo proveñen de Podemos na comarca de Ferrolterra.
O alcalde de Marinaleda, Juan Manuel Sánchez Gordillo (CUT), "apadriña" este venres en Ferrol a presentación pública da Plataforma Social Galega. Así o asegurou Carlos del Río, presidente de Ferrol en Común e que forma parte desta plataforma a título individual. Con todo, a entidade está constituída en boa parte por inscritos de Podemos na comarca de Ferrolterra.
Del Río asegurou que a presenza do político andaluz na presentación desta plataforma os "dignifica" e "gratifica". Ademais, deu conta de que o rexedor da Candidatura Unitaria de Traballadores será recibido polo seu homólogo en Ferrol, Jorge Suárez, á unha da tarde no Concello, "nun acto oficial".
ACTOS DE GORDILLO
Posteriormente, a partir das 18,00 horas, participará no centro cívico Carvalho Calero na presentación da Plataforma Social Galega, que segundo o activista ferrolán foi creada para "a defensa dos dereitos sociais no ámbito autonómico".
Sánchez Gordillo participará neste mesmo escenario nunha mesa redonda co político vasco Javier Madrazo. Estará moderada polo xornalista vasco Julio Flor e versará sobre o panorama político actual "tanto en España coma en Europa", e poderán acudir todas as persoas que así o desexen.
PLATAFORMA SOCIAL
Outro dos integrantes desta Plataforma Social Galega, Pepe Paadín, asegurou que esta entidade nace "polo distanciamento entre partidos políticos e a cidadanía, sobre todo en temas sociais".
Paadín destacou que a maioría de integrantes desta nova entidade proveñen de Podemos. "Saímos de aí un pouco desilusionados, porque ao final trabállase e actúase igual que no resto de partidos políticos", admitiu, antes de reivindicar que non se pode "permitir" que as persoas queden "tiradas na cuneta".
"(Hai que) Loitar, tentar agruparnos para poder conseguir algo, como a renda básica, que pensamos que si se pode conseguir", sentenciou.
Escribe o teu comentario