Cazan un condutor a 206 km/h en Verín

Axentes da Agrupación de Tráfico da Garda Civil do Destacamento de Verín (Ourense), que prestaban servizo de inspección de velocidade na autovía A-52, interceptaron un condutor a 206 quilómetros por hora, cando a velocidade máxima permitida é de 120 km/h nesa vía.

O home interceptado está investigado como presunto autor dun delito contra a seguridade viaria. Ademais, as mesmas fontes explican que ao condutor, A.A.Q.V., figúranlle no seu permiso de conducir varias condicións restritivas, referentes a mecanismos combinados e transmisión adaptada, ao contar con unha perna ortopédica, polo que conta con limitación de velocidade a 100 km/h.

A Benemérita lembra que a velocidade xenérica máxima para turismos e motos en autoestradas e autovías é de 120 km/h. En estradas secundarias, de 100 km/h ou de 90 km/h en función da anchura da beiravía e en vías urbanas, de 50 km/h.

Por tanto, segundo o Regulamento Xeral de Circulación, os condutores que incumpran a normativa cometerán unha infracción grave ou moi grave, sancionada con multa de 100 a 600 euros e a perda de entre 2 e 6 puntos, dependendo do exceso de velocidade cometido.

PAUS A MODO DE BAQUETAS

O helicóptero 'Pegasus' da Dirección Xeral de Tráfico (DXT) tripulado por un axente do Subsector de Tráfico da Garda Civil de Lugo interceptou na autovía A-6 a un condutor que simulaba tocar a batería ao volante con dous anacos de madeira.

Segundo informou Tráfico, na mañá do xoves foi avistado o condutor no quilómetro 516 da A-6, a autovía que une Madrid e A Coruña, ao seu paso pola provincia de Lugo.

'Pegasus' detectou un condutor que utilizaba, segundo relatan as mesmas fontes, "dous anacos de madeira a modo de baquetas para golpear con elas a parte superior do volante de dirección do vehículo coma se fose tocando unha batería ao ritmo da música".

O condutor foi observado nesta actitude "durante algo máis dun minuto", segundo concretan as mesmas fontes, "o cal lle permitiu percorrer un gran traxecto pola autovía".

Para iso soltara ambas as mans da condución "para asir un pau en cada unha delas, permanecendo nesta actitude ata que se decatou de que o helicóptero sobrevoaba o seu vehículo, momento no cal cesou na súa actitude", segundo relataron as mesmas fontes.

Por este motivo o individuo foi proposto para sanción por "tal neglixente actitude", segundo subliña Tráfico.