A Xunta apela a "un pacto ambiental" para frear o cambio climático

Os grupos critican a aposta por Sogama e Matogueira avanza leis contra o abandono animal e para protexer a natureza


|

Beatrizmatocambioclimatico


A conselleira de Medio Ambiente e Ordenación do Territorio, Beatriz Mato, apelou este martes ao "consenso" para pechar entre todos os grupos con representación no Parlamento "un pacto ambiental" encamiñado a protexer os valores naturais de Galicia e a loitar contra o cambio climático nun momento de "concienciación" da cidadanía. Con todo, os grupos da oposición consideraron que esta nova estratexia chega "tarde".


Mato salientou que esta será a lexislatura da aposta por "o verde e o azul", as cores que "definen Galicia". "Queremos converternos nun referente ambiental e sustentable dentro da UE", proclamou, convencida das oportunidades económicas, turísticas e de lecer que se abren coa protección natural.


Algunhas medidas que avanzou en materia ambiental son a posta en funcionamento "no primeiro trimestre" dunha rede galega das seis Reservas da Biosfera, o incremento do territorio incluído na Rede Natura, a conclusión do plan de saneamento das rías (con 131 millóns de euros ata 2020) e a apertura dun observatorio sobre o estado dos ríos.


Ao fío diso, tras anunciar unha actualización da Lei de patrimonio natural e unha norma "ambiciosa" contra os malos tratos e o abandono animal --que a Xunta aprobará "este mes"--, a titular de Medio Ambiente avogou por "potenciar o pacto local da auga" a través dun convenio coa Fegamp e as catro deputacións relativo á colaboración financeira e técnica en materia de depuración e saneamento.


Finalmente, destacou a "eficiencia" de Sogama, anticipou a fusión de Meteogalicia co Laboratorio de Medio Ambiente para crear o Centro Tecnolóxico do Medio Ambiente e ratificou o seu compromiso cun urbanismo "responsable" e coa protección da paisaxe.


CHEGA "TARDE"


Enfronte, os portavoces na materia dos distintos grupos da oposición --BNG, PSdeG e En Marea-- cuestionaron que agora a Xunta decida tomar medidas contra o cambio climático, oito anos despois da chegada de Alberto Núñez Feijóo a San Caetano.


"Chegan máis tarde que o primo de Rajoy", ironizou Antón Sánchez, de En Marea, mentres o nacionalista Luís Bará propuxo que, para loitar contra o cambio climático, se modifique a política enerxética poñendo fin ao "veto" ás renovables.


Pola súa banda, a socialista Patricia Vilán lamentou, do mesmo xeito que o representante do Bloque, a política de "eslóganes" da Xunta, pois "desde 2008" non tivo tempo de redactar o plan de protección do lobo aínda que segue anunciando medidas.


Ademais, do mesmo xeito que o resto de portavoces, censurou o modelo de Sogama, que Antón Sánchez vinculou directamente co "negocio" de Gas Natural Fenosa e Luís Bará considerou "un auténtico sumidoiro de diñeiro público".


Tamén Vilán e Sánchez coincidiron ao criticar os escasos fondos cos que conta a Consellería de Medio Ambiente, ata o punto de que a socialista considerou que o é "de cuarto de ambiente". Finalmente, Bará requiriu que se prohiban as corridas de touros.

relacionada A futura lei de patrimonio natural contempla multas de ata dous millóns
relacionada Medio Ambiente confía en que as choivas aumenten os encoros e ríos galegos
relacionada A seca deixa ao descuberto os vestixios do antigo pobo de Portomarín, en Belesar

Sen comentarios

Escribe o teu comentario




He leído y acepto la política de privacidad

No está permitido verter comentarios contrarios a la ley o injuriantes. Nos reservamos el derecho a eliminar los comentarios que consideremos fuera de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal - Política de Cookies - Política de Privacidade - Configuración de cookies - Consello editorial - Publicidade
Powered by Bigpress
CLABE