Fenosa traballa para repoñer a subministración eléctrica a 97.000 clientes

O temporal de forte vento e choiva que afecta a Galicia causou diversas incidencias na rede eléctrica debido ao que Unión Fenosa, en concreto, traballa para repoñer a subministración a 97.000 clientes.

Unión Fenosa Distribución destacou que atende unhas 120 incidencias na súa rede eléctrica nas catro provincias galegas e, ás 10,00 horas traballaba para "repoñer a subministración dos 97.000 clientes que estaban sen servizo".

As provincias da Coruña e Pontevedra concentran dous terzos dos clientes sen subministración, segundo indicou a compañía, que engadiu que "puido recuperar a subministración a preto de 90.000 clientes nas últimas horas". "E estase traballando para repoñer o servizo dos restantes o máis axiña posible e normalizar o servizo", destacou.

A maioría das incidencias están ocasionadas pola caída de árbores, ramas e cortizas sobre as liñas debido ao forte vento rexistrado nas últimas horas.

Fenosa explicou que as "adversas condicións meteorolóxicas" e as "dificultades de acceso" ás liñas afectadas "están a complicar o labor das brigadas", que traballaron durante toda a noite.

DISPOSITIVO

Unión Fenosa Distribución mantén despregado un dispositivo especial dunhas 500 persoas, entre brigadas, operadores de rede e da plataforma telefónica, para facer fronte aos problemas de subministración eléctrica causados polo temporal en Galicia.

Ademais, a compañía comentou que prepara os seus dispositivos "ante os eventuais problemas na rede que poidan continuar causando as condicións meteorolóxicas previstas para as próximas horas".

A compañía distribuidora, que mantén un "contacto permanente" coa Consellería de Economía, Emprego e Industria, segundo puntualizou, reforzou o seu teléfono de atención de incidencias na subministración (900 333 999).

Ademais, os usuarios poden atopar información actualizada sobre o estado da rede na web de Unión Fenosa Distribución ou na aplicación tuluz.