Estes son os servizos mínimos decretados pola Xunta durante a folga nas escolas infantís

A Xunta de Galicia regulou este martes mediante o Diario Oficial de Galicia (#DOG) os servizos mínimos que rexerán durante a xornada de folga convocada este mércores nunha ampla variedade de centros de atención social e educativa. 

As ordes, asinadas polas consellerías de Política Social e Igualdade e de Presidencia, afectan a escolas infantís de 0 a 3 anos, centros para persoas con discapacidade, centros de educación especial e centros de reforma xuvenil e protección de menores. Os sindicatos convocantes non detallaron publicamente, até o peche desta información, as razóns concretas deste paro do 3 de xuño.

Nas escolas infantís, a norma esixe a presenza de polo menos dúas traballadoras de atención directa para garantir a apertura de cada centro. Naqueles con dous ou máis unidades en funcionamento, deberá incorporar ademais unha persoa adicional por cada aula activa. 

Nos centros docentes, será obrigatoria a presenza da dirección ou dun membro do equipo directivo, xunto ao 20% do persoal de comedores, limpeza, coidadores e persoal sanitario.

DISCAPACIDADE E MENORES

Para os centros de atención a persoas con discapacidade, os servizos mínimos equipásense aos dun domingo ou festivo habitual; nos que permanecen pechados eses días, tomarase como referencia o sábado. 

os servizos de atención diúrna ocupacional, o cociente de persoal de atención directa fíxase entre o 0,10 e o 0,14, mentres que nos centros de atención diúrna terapéutica varía segundo o tipo de discapacidade atendida: 0,14 para discapacidade intelectual e dano cerebral adquirido, e 0,20 para discapacidade física, parálise cerebral e TEA. Mantéñense tamén os servizos de transporte e comedor en todos os centros que os ofrezan habitualmente.

A Xunta detallou tamén o persoal mínimo concreto para os seus dous grandes centros propios. O Centro de Atención a Persoas con Discapacidade de Ourense contará con dez coidadores, un médico, un traballador social, un psicólogo, un logopeda, un terapeuta ocupacional, un educador social, dous monitores, técnico de mantemento, recepción e xestión. 

O de Souto de Leixa funcionará con cinco coidadores, un enfermeiro, un técnico de xestión farmacéutica, limpador, cociñeiro, recepción e dous monitores. Para os centros de reforma xuvenil e protección de menores, a referencia é o Decreto 329/2005. O sector da educación infantil leva meses denunciando cocientes desbordadas, salarios baixos e a falta de recoñecemento do ciclo 0-3 como etapa educativa