Iglesias quere a Errejón ao seu lado "pase o que pase" en Vistalegre

O secretario xeral de Podemos, Pablo Iglesias, asegurou que quere o actual secretario Político da súa formación, Íñigo Errejón, nun "nivel de responsabilidade equivalente ao que ten agora" tras a celebración da Asemblea Estatal Cidadá de Vistalegre II do próximo febreiro "pase o que pase" nesta cita.

"Dígoo de forma clarísima", apostilou durante unha entrevista na Sexta recollida por Europa Press, aínda que precisou que a responsabilidade futura de Errejón dentro do partido "dependerá do Consello Cidadán" que saia de Vistalegre II. "Pero se de min dependese, eu non teño dúbidas", recalcou.

Do mesmo xeito, Iglesias afirmou que no caso de que se impoñan as teses de Errejón na Asemblea Estatal Cidadá, que se celebrará os días 10, 11 e 12 de febreiro en Madrid, o actual 'número dous' do partido sería "de facto" o "líder a organización".

Ante ese escenario, Iglesias anunciou que se poñerá "ás ordes" dunha hipotética dirección do partido afín a Errejón e continuará "dunha maneira máis discreta", aínda que insistiu en que por "coherencia" non liderará Podemos se os documentos organizativos de 'Recuperar a ilusión', nome co que a corrente 'errejonista' presentou as súas propostas para Vistalegre II, sexan as máis votadas polos inscritos.

Propostas que o actual secretario xeral de Podemos cualificou como "máis conservadoras" para distancialas das do seu equipo, sinalando ademais que os integrantes da corrente afín a Errejón pensaron en apoiar un goberno de PSOE e Cidadáns, algo que Iglesias rexeitou o ano pasado.

Ademais, preguntado pola posibilidade de que desde o sector 'errejonista' traballse en segredo para derrocalo, Iglesias non quixo negar esta posibilidade, esquivando unha resposta rotunda. "Non podo ser máis cristalino", limitouse a precisar tras repetir en varias ocasións que non sinalaría a ninguén dentro do partido. "Non sairá da miña boca ningunha acusación a un compañeiro", dixo.