O Celta suma outra vitoria a pesar das rotacións

O Celta logrou en Butarque unha solvente vitoria, dun gran valor no durísimo calendario que afrontan os vigueses. O conxunto celeste, sólido e voraz, derrotou o Leganés con tantos de Lemos, no seu debut en Primeira, e Guidetti, de penalti cometido sobre Sisto tras unha fantástica xogada do danés.

O comezo foi igualado, cun Celta un tanto incómodo co estado do terreo de xogo e un Leganés brioso e decidido. Sen apenas ocasións, pero cos vigueses mellorando, aos 32 minutos chegou unha poutada celeste. Lemos recibiu e Señé no corazón da área, virouse como un hábil dianteiro e rematou coa zurda como un verdadeiro 'killer'. Balón á madeira e á rede para redondear o seu debut en Primeira División. Ata o descanso non houbo trafego nas áreas e si unha mala noticia, a lesión de Rossi, substituído por Guidetti.

Tras a continuación, o cadro local tomou a iniciativa, aínda que con moitos balóns longos que os vigueses defendían con solvencia e tamén con numerosas opcións a balón parado tamén liquidadas con autoridade pola zaga visitante. O Celta, extremadamente sólido, volveu golpear aos 20 minutos cunha xogada marabillosa de Sisto, que caeu derrubado na área de maneira clara tras desfacerse de dous rivais. O penalti lanzouno Guidetti para ampliar a vantaxe celeste.

O equipo vigués controlou o choque con autoridade ata o final e sumou unha valiosa vitoria a domicilio.

FICHA TÉCNICA

0-UD Leganés: Herrerín, Víctor Díaz, Mantovani, Insua, Adrián Marín, Rubén Pérez, Timor (Luciano, min.53), Unai López (Machís, min.73), Gabriel, Szymanowski (Samu García, min.73) e Guerreiro.

2-RC Celta: Sergio, Hugo Mallo, Sergi Gómez, Fontás, Panas, Radoja, Pablo Hernández, Señé (Jozabed, min.90), Sisto, Lemos (Jonny, min.79) e Rossi (Guidetti, min.43).

Goles: 0-1, min.32: Lemos; 0-2, min.65: Guidetti, de penalti.