Galicia rematou 2016 con 18.500 desempregados menos que o ano anterior

O paro en Galicia baixou en 2016 en 18.500 persoas respecto ao ano anterior, un 8,32% menos, polo que a taxa de desemprego sitúase no 16,29% e o número total de desempregados en 204.200, segundo datos da Enquisa de Poboación Activa (EPA) feita pública este xoves polo Instituto Nacional de Estatística (INE).

No último trimestre do ano, o número de persoas desempregadas en Galicia baixou en 2.600 persoas, un 1,24% menos respecto ao trimestre anterior. O número de ocupados, ao termo do ano pasado situouse en Galicia en 1.049.600, 17.100 máis que ao peche de 2015, un 1,65% máis.

A nivel nacional, o paro baixou en 541.700 persoas en 2016, o que supón un 11,3% menos que en 2015, rexistrando o seu cuarto descenso anual consecutivo e unha das maiores caídas da serie histórica. Con todo, este descenso é inferior ao experimentado o ano pasado, cando o desemprego rexistrou un retroceso histórico de 678.200 persoas.

Pola súa banda, o emprego creceu en 2016 en 413.900 persoas, case un 2,3%, logrando o seu terceiro aumento anual consecutivo. Con todo, este incremento da ocupación é menor que os rexistrados en 2014 e 2015, cando se crearon 433.900 e 525.100 postos de traballo, respectivamente, informou este xoves o Instituto Nacional de Estatística (INE).

Desta forma, 2016 pechou con 18.508.100 ocupados e con 4.237.800 parados, a súa cifra máis baixa desde o terceiro trimestre de 2009. Así, a taxa de desemprego situouse ao finalizar 2016 no 18,63%, case 2,3 puntos menos que en 2015 (20,9%) e o seu nivel máis baixo desde o terceiro trimestre de 2009.

Co descenso do paro logrado en 2016, encadéanse catro anos consecutivos de baixadas despois de seis anos de incrementos. En 2015, o paro rexistrou a maior caída da serie histórica, con 678.200 desempregados menos.

A eses 4,23 millóns de parados reflectidos pola Enquisa de Poboación Activa (EPA) chegouse despois de que o paro baixase no último trimestre de 2016 en 83.000 desempregados (-1,9%), o seu mellor dato neste trimestre desde o arranque da crise.

ESPAÑA CREA EMPREGO POR TERCEIRO ANO CONSECUTIVO

En 2016, España creou emprego por terceiro ano consecutivo tras seis anos destruíndoo. Así, o ano pasado xeráronse 413.900 postos de traballo, cun ritmo de crecemento anual do 2,29%, inferior ao dun ano antes (2,99%).

Todos os empregos creados o exercicio pasado concentráronse no sector privado, con 428.500 novos postos de traballo (+2,8%), xa que o sector público destruíu 14.600 empregos no ano (-0,49%).

No cuarto trimestre de 2016 perdéronse 19.400 postos de traballo, un 0,1% menos respecto ao trimestre anterior. Este retroceso contrasta cos avances da ocupación logrados nos cuartos trimestres de 2014 (+65.100) e de 2015 (+45.500).