Davy Roef: "Esta é a miña oportunidade, vir aquí e mellorar"

Davy Roef, novo porteiro do Dépor. //Fonte: RC Deportivo.

Davy Roef superou esta mañá o recoñecemento médico no Hospital HM Modelo da Coruña e asinou a continuación o seu contrato de cesión polo Deportivo ata o próximo 30 de xuño. Nas súas primeiras declaracións aos medios de comunicación, recollidas na web do club, o porteiro belga manifestou estar "moi feliz" de fichar polo Dépor. "É unha gran oportunidade de xogar na liga Española, para min a mellor liga do mundo", apunta.

Confesou coñecer o club "pola súa gran historia". Dixo lembrar a eliminatoria de Liga de Campións ante o Milan, que se saldou co pase a semifinais do Deportivo; e lembrou a Roy Makaay e a Diego Tristán.

No Anderlecht, o seu club de procedencia, "xoguei uns 30 partidos. Despois o adestrador decidiu cambiarme polo segundo porteiro. Agora estou contento de ter a miña oportunidade no Deportivo". "O adestrador decidiu non volver meterme e eu tiña que facer algo distinto para mellorar. Esta é a miña oportunidade, vir aquí e mellorar", insiste.

Con Tyton e Lux na súa mesma posición no Dépor, Roef promete "traballo todos os días moi duro. Vou competir cos outros dous porteiros". A pesar de que recoñece que o contrato é de cesión unicamente ata final de tempada, "no fútbol nunca se sabe o que vai pasar. Nestes momentos a idea é de volver a Bélxica".