"Non merecen que se lles abandone", familiares e Xunta piden que España siga buscando aos desaparecidos do Villa de Pitanxo

Tras a decisión de Canadá de parar a procura dos doce desaparecidos, a Xunta trasladou á Moncloa a proposta de que se amplíe  e suxeriu que esta se podería materializar "con medios propios ou alleos".

Familiares dos tripulantes quéixanse de falta de información. Reclaman ao Goberno que use barcos españois para seguir buscando. Se non aparecen os corpos, pasarán meses antes de que poidan ser considerados oficialmente falecidos. Por agora, o Estado só indica que está en comunicación cos canadenses para ver se hai posibilidade de volver buscar.

Familiares dos mariñeiros do pesqueiro 'Villa de Pitanxo' reclamaron ao Goberno de España que retome pola súa conta as tarefas de procura dos 12 mariñeiros que permanecen desparecidos. "Xa sabemos que están mortos, pero esas 12 persoas non merecen que se lles abandone", aseverou María José Dopazo, filla de Francisco Dopazo, un dos tripulantes do barco que aínda non foi localizado.

Os achegados e familiares do barco marinense afundido en Terranova o pasado martes denunciaron a ausencia de información sobre o operativo de rescate e aseguran coñecer polos medios de comunicación a suspensión definitiva da procura por parte das autoridades canadenses.

QUEIXAS DE FALTA DE INFORMACIÓN
"Non temos información de nada. Se non nos poñemos nós en contacto ao velo nos medios de comunicación, non saberiamos que se suspenderon o rescate", exclamou Christopher González, fillo de Fernando González, á súa chegada á Autoridade Portuaria de Marín, onde manterán un encontro co ministro de Pesca, Luís Planas, e representantes da armadora do pesqueiro.

"Non notamos nin cooperación, nin axuda, nin amparo. Queremos que se poñan os medios que ten España. Se Canadá non quere poñer medios, España ten medios suficientes"

As familias, que aseguran estar "desamparadas", esixen que España retome pola súa conta a procura dos mariñeiros que permanecen desparecido e así llo trasladarán ao ministro. 

"Non notamos nin cooperación, nin axuda, nin amparo. Queremos que se poñan os medios que ten España. Se Canadá non quere poñer medios, España ten medios suficientes na zona", defendeu María José Dopazo.