​Enfado da hostalería galega polo “incalculable dano económico” das restricións da Xunta

A Xunta anunciou onte o alivio dalgunhas restricións, como o fin do "toque de non queda" ou a prohibición do uso das barras nos bares.

Con todo, seguen existindo limitacións de horario que desde a Asociacion Empresarial Hostalaria.gal denuncian polos prexuízos que ocasionan ao sector.

Clientes nunha terraza | Foto: EP

O levantamento progresivo das restricións anunciado onte polo Goberno de Galicia foi recibido con insatisfacción polo conxunto da hostalería galega, que ve como se prolongan algunhas restricións que aínda lastran ao sector tras case dous anos de pandemia. A Asociación Empresarial Hostalaria.gal denuncia o “incalculable dano económico” que están a facer estas limitacións a un sector tan castigado.

“Cando xa se cumpren dous anos do inicio da pandemia, a hostalería segue sometida a limitacións que non permiten traballar na legalidade establecida das nosas licenzas, tanto en horarios como en límites de capacidade”, critican desde o colectivo, que viu a luz hai apenas unha semana e que busca ser un órgano de representación para os negocios de Santiago e arredores.

As restricións, denuncian, provocaron o peche de negocios nun sector crave para a economía galega e a recuperación, e nun contexto no que a facturación en Nadal foi mínima. Por isto, desde Hostalaría.gal reclaman “a eliminación de todas as medidas restritivas, que demostraron ser totalmente ineficaces a respecto dos contagios por Covid-19”.

“A pesar das numerosas imposicións que supoñen unha dificultade no desenvolvemento da nosa actividade, o número de contagios desta sexta onda foi enorme, o cal demostra que o camiño das limitacións aplicadas de maneira case exclusiva ao noso sector non dá resultado, tal e como previamos desde hai tempo”, agregan, á vez que solicitan “medidas económicas” que apoien ao sector.