O condutor do accidente de Caldas, no que faleceron tres novos, non tiña permiso de conducir

O piloto, de 19 anos, natural de Moraña e que tamén faleceu no siniesto, non contaba con carné de conducir e todo apunta a que se saltou un stop, o que provocou o fatal suceso.

Xunto co condutor viaxaban outros dous mozos, unha moza de 18 e un home de 24 anos, que tamén perderon a vida froito do impacto rexistrado ao redor das 23:20 horas do mércores.

Imaxe do accidente nunha foto da televisión de Galicia

O mozo condutor falecido no accidente de Caldas de Reis (Pontevedra), no que tamén perderon a vida outros dous mozos que ían no mesmo vehículo, carecía de carné de conducir e a investigación apunta a que posiblemente se saltou un stop antes de chocar cun camión.

Así o informaron a Europa Press fontes próximas á investigación, que confirmaron que o veciño de 19 anos de Moraña que conducía o turismo carecía de permiso de condución.

As mesmas fontes puntualizaron que, aínda que prosegue a investigación para aclarar os feitos, "todo apunta" a que o turismo no que viaxaban os tres novos "saltouse un stop".

Este sinistro tivo lugar sobre as 23,20 horas deste mércores no quilómetro 222 da estrada N-640 ao seu paso por Caldas de Reis, segundo os datos facilitados pola Garda Civil.

O accidente consistiu na colisión frontolateral dun camión frigorífico cun turismo no que viaxaban os tres novos falecidos, indicaron as mesmas fontes.

VÍTIMAS

As vítimas son o condutor do turismo, un home de 19 anos veciño de Moraña; a copiloto, unha moza de 18 anos de Vilagarcía de Arousa; e outro home de 24 anos veciño de Caldas de Reis, que ía na parte de atrás do vehículo.

Pola súa banda, o condutor do camión saíu ferido leve e o seu acompañante, unha muller que saíu despedida do vehículo, resultou ferida grave, aseguraron as mesmas fontes.

Ao condutor do camión practicáronselle as probas de alcoholemia e drogas nas que lanzou resultado negativo.

Ademais da Garda Civil de Tráfico, foron mobilizados os servizos sanitarios e os Bombeiros do Salnés, que excarceraron ás tres vítimas do interior do vehículo; así como a Policía Local e Protección Civil.

Así mesmo, tamén se puxeron os feitos en coñecemento do Grupo de Intervención Psicolóxica en Catástrofes e Emerxencias (GIPCE) para prestar apoio aos familiares das vítimas neste accidente, concretou o 112 Galicia.