Incendios en O Courel e A Fonsagrada por queimas da Consellería do Medio Rural, denuncian ecoloxistas

Desde a organización Por Un Monte Galego con Futuro sinalan ante as fiscalías de Ourense e Lugo á Xunta como responsble de varios incendios do pasado abril. 

O Courel e a reserva da biosfera Oscos-Fonsagrada-Terras de Burón sufriron as consecuencias das queimas da Consellería, segundo a plataforma. 

Un bombeiro nun incendio | Foto: EP

A plataforma Por Un Monte Galego con Futuro denunciou ante as fiscalías de Ourense e Lugo os incendios "producidos" o pasado mes de abril "como consecuencia das queimas levadas a cabo pola Consellería do Medio Rural na serra de O Courel e na reserva da biosfera Oscos-Fonsagrada-Terras de Burón".

Nun comunicado, censura que a Administración galega, "con absoluto desprezo ao risco ao risco de incendio dadas as condicións meteorolóxicas que se estaban producindo", "decidiu levar a cabo queimas supostamente preventivas que mesmo nalgúns casos saltaron das áreas previstas dando lugar a incendios forestais que destruíron importantes superficies de terreos protexidos".

"Equipos da Consellería do Medio Rural, co apoio da UME, provocaron incendios na serra de O Courel (Lugo), afectando a unha considerable superficie neste espazo protexido, e no monte Muradal, no Concello da Fonsagrada, en plena Reserva da Biosfera de Oscos-Fonsagrada-Terras de Burón", sostén esta plataforma.

Asegura que "non é a primeira vez" que se producen estas prácticas perigosas co lume, que achaca a "unha grave neglixencia con responsabilidade criminal por parte da Administración".

A este respecto, apunta que estes incendios causaron "graves danos" nos ecosistemas, pero tamén un "importante gasto", debido a que só na serra de O Courel "tívose que mobilizar cinco helicópteros, dous avións de carga en terra, buldózeres e varias motobombas".