O comité clínico anuncia os peches de Cambados, Vilanova de Arousa, Laza e Cualedro desde venres

Os catro municipios pasan a estar no nivel máximo de restricións, que supón o peche da hostalería, prohibidas as reunións de non conviventes e o peche perimetral da localidade para partir do 7 de maio.

A gran incógnita é que ocorrerá a partir do 9 de maio, momento no que concluirá o estado de alarma. A Xunta anunciará o seu plan de roteiro esta mesma semana. 

O comité clínico anuncia novos peches | Foto: EP

As localidades de Cambados, Vilanova de Arousa, Laza e Cualedro pasarán a estar en nivel máximo de restricións pola covid-19 a partir das 00,00 horas do próximo venres, día 7 de maio. Nestes municipios, os veciños non poden saír salvo causas xustificadas, a hostalería permanece pechada e están prohibidas as reunións de non conviventes.

Así o comunicou este martes a Consellería de Sanidade tras a reunión do comité clínico que asesora á Xunta na xestión da pandemia, que determinou que A Merca, A Pastoriza, Marín, Gondomar, Salceda de Caselas, Padrón, Mesía, Ribeira, Coristanco e A Laracha pasen ao nivel alto, o seguinte con maiores restricións.

Ademais, as medidas do nivel medio serán de obrigado cumprimento nos termos municipais de Carballeda de Valdeorras, Verea, Muíños, Verín, Xinzo de Limia, Allariz, Toén, Chantada, Meira, Cerdedo-Cotobade, Vilagarcía de Arousa, Soutomaior, Fornelos de Montes, Cangas, O Porriño, Tui, Nigrán, Lalín, Silleda, Noia, Melide, Ordes, Carballo, Betanzos e Cambre. Ademais, entre estes municipios está Vigo, a única das sete grandes cidades galegas neste nivel de restricións.

Pola súa banda, no resto dos concellos galegos estarán vixentes as restricións fixadas no nivel medio baixo. Todas as medidas entrarán en vigor ás 00,00 horas do próximo venres, día 7 de maio.

Deste xeito, o comité clínico inclínase por seguir aplicando peches perimetrais nos municipios e limitacións nos horarios das actividades, singularmente na hostalería. Con todo, prevese que o vindeiro xoves se volva a reunir este órgano que asesora á Xunta para abordar as medidas que se aplicarán en Galicia a partir do levantamento do estado de alarma o próximo 9 de maio.