O primeiro campo de golf de Galicia que recicla as súas augas residuais abre as súas portas o 24 de maio en Oleiros

O complexo Golf Xaz abrirá gradualmente a partir do próximo mes e defínese "como un club social, deportivo e familiar cunhas instalacións deportivas de primeiro nivel".

Campo de golf | Foto: EP

Golf Xaz, cuxa apertura, gradual, comeza o próximo 24 de maio en Oleiros (A Coruña), reivindícase como o primeiro campo de Galicia que reciclará augas residuais.

Tras un investimento de 10 millóns de euros, Golf Xaz abrirá as súas portas "como un club social, deportivo e familiar cunhas instalacións deportivas de primeiro nivel", segundo destaca.

Será, asegura, o primeiro campo de golf de Galicia en reciclar augas residuais, "adiantándose 20 anos na xestión sostible da auga". "Para iso conxugou a última tecnoloxía no tratamento de augas e case 40.000 metros de tubaxes enterradas, cos máis modernos sistemas de xestión de rega", explica.

Así, explica que se construíu un lago con máis de 20.000 metros cúbicos de capacidade que recolle a auga de choiva caída no campo, así como as augas residuais recicladas procedentes da próxima estación depuradora de augas residuais de Xubín.

"Con todo iso, conseguiuse non só sexa autosuficiente e sostible desde o punto de vista do aproveitamento da auga, senón que contribúa á sustentabilidade da contorna, en concreto á xestión eficiente das augas residuais do concello de Oleiros", apunta.

Ademais, asegura que a posta en marcha do que será o primeiro campo de golf que se abre en Galicia desde 2007 xerará 20 empregos directos e 100 indirectos "aos que hai que sumar os propios da xestión das instalacións e da restauración".