Unha de cada tres incidencias no 112 en 2020 foi por motivos sanitarios, reflicten os datos en Galicia

Os servizos de emerxencia en Galicia atenderon o pasado preto dun millón de chamadas. Concretamente, foron 970.000, aínda que delas só 233.000 derivaron en incidencias. 

Nesa orde, e por mor da crise sanitaria, os servizos de emerxencia prestaron apoio psicolóxico a máis de 700 persoas durante o confinamento.

Representantes da 112 | Foto: EP

A central do 112 recibiu un total de 970.000 chamadas que derivaron en 233.000 incidencias ao longo dun ano 2020 marcado pola pandemia de covid-19 que se deixou notar na tipoloxía de emerxencias xestionadas desde a Axencia Galega de Emerxencias cun incremento das relacionadas con cuestións sanitarias e descensos en accidentes ou sucesos na estrada.

O balance anual do 112 foi presentado este luns nunha rolda de prensa ofrecida polo director xeral de Interior e Emerxencias, Santiago Villanueva, e o xerente da Axega, Marcos Araújo; que repasaron as cifras dun 2020 condicionado pola pandemia da que se cumpre un ano nestas datas.

Como resaltou Villanueva, a declaración do estado de alarma o 14 de marzo de 2020 e o confinamento domiciliario vivido durante a primavera, unido ás restricións de mobilidade que imperaron en Galicia durante boa parte dos últimos doce meses, ten o seu reflexo nas cifras do 112, que atendeu unhas 8.0000 incidencias menos relacionadas con accidentes na estrada que en 2019.

Por contra, o volume de xestións vinculadas a motivos sanitarios experimentou un ascenso de máis de 15.000 respecto ao anterior ano: 85.959 en 2020 por 69.479 en 2019. A sanitaria, foi, un ano máis, a razón máis común para solicitar axuda ao 112 ao representar máis do 36% das incidencias xestionadas e case tres veces máis que a seguinte tipoloxía na lista, a petición de axuda ás forzas de seguridade (32.306, 500 menos que en 2019).

CHAMADAS E INCIDENCIAS

Así as cousas, o teléfono 112 recibiu en 2020 un total de 970.000 chamadas, 14.000 máis que o anterior ano. Estas xeraron 236.000 incidencias que motivaron a mobilización de recursos, o que supón un incremento do 1,4% respecto a 2019 (3.200 máis).

Para Villanueva, o cociente de mobilización de recursos por número de chamadas recibidas na central do 112 reflicte unha tendencia a "mellor utilización" do teléfono de emerxencias, xa que a cidadanía diríxese a números diferentes, como o 012, para realizar outro tipo de consultas.

Na repartición por provincias, as máis poboadas, A Coruña e Pontevedra, coparon a maior parte das incidencias xestionadas con case 92.000 e 85.000, respectivamente; fronte ás 30.000 de Ourense e as 26.400 de Lugo. Case 2.500 foron derivadas doutras comunidades autónomas.

AUMENTO DO 30% EN PROTECCIÓN CIVIL

Outro dos aspectos destacados no balance anual é o incremento do 30% dos operativos levados a cabo por agrupacións de Protección Civil. En total, foron 21.192 os operativos articulados desde o 112 en 2020, case 7.000 máis que no exercicio anterior.

Destes, a maior parte (4.088) corresponderon a tarefas de desinfección en residencias, centros de saúde, hospitais ou zonas públicas; mentres que 1.717 estiveron relacionadas coa repartición de alimentos e medicinas.

Durante os primeiros compases do confinamento nos meses de marzo e abril produciuse un "aumento significativo" das consultas ás salas do 112 e o 061. A creación dun número específico para este tipo de xestións normalizou a situación, segundo resaltaron os responsables de emerxencias.

ATENCIÓN PSICOLÓXICA

Así mesmo, a central do 112 prestou atención psicolóxica a 727 persoas durante os meses de marzo (195), abril (511) e xuño (21) ao amparo dun convenio subscrito co Colexio de Psicólogos de Galicia para prestar apoio aos cidadáns durante o confinamento.

A maioría dos solicitantes de axuda psicolóxica eran persoas de entre 40 e 70 anos habitantes da Galicia urbana, onde o impacto do confinamento, en palabras de Santiago Villanueva, foi maior por producirse en pisos e con pouco contacto co exterior.

Tamén se produciron outros 2.014 incidentes relacionados con situacións de emerxencia social, maiormente, vinculados a caídas no interior de edificios ou persoas vulnerables.

CHAMADAS MALICIOSAS

Outra das consecuencias da pandemia foi, segundo Santiago Villanueva, o incremento das 'chamadas maliciosas', é dicir, aquelas que non teñen un motivo real detrás.

As razóns detrás deste incremento "importante" destas chamadas está en que a "xente tivo máis tempo libre" durante os meses de confinamento.