Detido un home por insultar a gais e lesbianas no centro de Vigo

Segundo informaron fontes policiais, o home dedicábase a insultar e a increpar a persoas pola súa orientación sexual, acosándoas até tal punto que unha das vítimas viuse obrigada a abandonar o seu posto de traballo varias veces debido á "situación de humillación" que lle causaba o investigado. Estes feitos prolongábanse durante horas, nunha rúa peonil da cidade olívica.

Os feitos que deron inicio á actuación policial ocorreron a finais de agosto, cando o 091 recibiu unha chamada porque un home estaba a increpar a catro mulleres. A denunciante explicou que estaba a pasear pola rúa da man da súa parella, en compañía doutra parella amiga, e que o home comezou a gritarlles e a referir á súa orientación sexual, "repetindo frases en bucle mentres as miraba fixamente".

Durante a intervención, un traballador da zona aproximouse aos axentes para informarlles de que o ocorrido non era un feito illado, xa que ese home repetira ese comportamento cara a el en varias ocasións nos últimos tres meses. Segundo o seu relato, de maneira constante e varias veces á semana, o investigado increpáballe e atacáballe verbalmente pola súa orientación sexual.

O traballador explicou que eses episodios lle provocaron unha situación de tensión e ansiedade, e que se viu obrigado a abandonar o seu posto en varias ocasións. Así mesmo, sinalou que esta situación se repetía por parte do home, coaccionando a persoa que se atopaban na rúa, aos que chegaba a acosar durante horas.

Por todo iso, a Policía procedeu á detención deste home, como presunto autor dun delito de odio, e informou as vítimas da conveniencia de presentar denuncia por estes feitos en Comisaría.