O curso escolar arrinca con 803 prazas de profesores sen cubrir

O sindicato denunciou nas últimas horas que o curso non arrinca con normalidade, senón con máis de 800 prazas sen cubrir en toda a comunidade. Segundo a organización sindical, esta cifra corresponde a permisos, incapacidades temporais e outras vacantes que a Consellería de Educación non cubriría a tempo para o inicio das clases. Para a CIG, esta situación evidencia unha mala planificación e agrava os problemas de organización dos centros, que contaron, segundo critican, con tan só cinco días para preparar a totalidade do curso académico.

Con todo, a perspectiva desde a Xunta  é outra. O presidente da Xunta, Alfonso Rueda, acompañado polo conselleiro de Educación, Ciencia, Universidade e FP, Román Rodríguez, inaugurou oficialmente o curso no CPI Plurilingüe de Vedra. Durante o acto, o Goberno galego ha destacado que un total de 302.843 alumnos desde Educación Infantil até Bacharelato incorpóranse ás aulas nun ano académico que, segundo os seus datos, alcanza unha marca histórica de docentes con 31.766 profesores, o que supón 153 máis que o curso anterior. 
 

Desde a administración autonómica púxose o foco na vontade de seguir profundando na modernización do sistema, a mellora dos cocientes, a aposta pola inclusión e a atención á diversidade, así como o desenvolvemento dunha nova Lei de educación dixital.

Esta disparidade de visións non é nova; cada inicio de curso prodúcese un baile de cifras no que a Xunta defende o número total de efectivos que compoñen o persoal estrutural, mentres que os sindicatos centran a súa denuncia nos postos que, por distintas circunstancias, non teñen un profesor asignado no primeiro día lectivo.

O sindicato nacionalista tamén pon o acento na crecente precariedade que, ao seu xuízo, está a instalarse no corpo docente. Advirten que o incremento das medias xornadas non fai máis que precarizar as condicións laborais do profesorado, dificultando ao mesmo tempo a cobertura das ausencias e a correcta atención ao alumnado. Desde a CIG lembran que xa alertaran de que o cinco días concedidos previamente aos equipos directivos e ao profesorado interino para preparar o inicio do curso eran insuficientes.

O sindicato insiste en que esta ausencia de persoal ten un efecto directo no alumnado e nas familias, dificultando a cobertura de itinerarios formativos e o normal funcionamento dos centros. Aseguran que a suposta “melloría de ratio” anunciada pola Xunta aplícase unicamente en determinados niveis e non compensa o problema das prazas sen cubrir.

Manifestación o sábado e folga o 25 de setembro

Ademais da falta de persoal, o sindicato anunciou a convocatoria dunha xornada de folga no ensino público para este mesmo mes, unha medida de presión coa que buscan forzar á Consellería a negociar melloras nas condicións laborais e na xestión das substitucións. 

Para ir preparando o ambiente para a folga, a CIG convocou unha manifestación en Santiago este sábado 13 de setembro, á que acudirán autobuses organizados desde diferentes localidades galegas, desde A Coruña e Vigo até Lugo, Ferrol ou Ourense.

O libro electrónico retrocede tras as protestas

Este curso tamén arrinca con novidades pedagóxicas que xeraron debate na comunidade educativa. Unha das máis significativas é a modificación do programa de libro electrónico E-Dixgal. Tras anos de expansión, a Xunta decidiu reformularlo para dar paso a un modelo híbrido en moitos centros.

 Este cambio implica que, en varias etapas, o alumnado volverá contar con libros de texto en formato físico como complemento aos recursos dixitais, unha decisión que a administración xustifica en base a criterios pedagóxicos e á necesidade de equilibrar o tempo de exposición ás pantallas.

O pasado ano, o Goberno autonómico anunciou unha reorganización do sistema tras detectar críticas entre familias e docentes, que cuestionaban tanto os problemas técnicos como a falta de flexibilidade do modelo.

O arranque escolar en Galicia convértese así nun escenario de contraste. 

A comunidade educativa regresa ás aulas entre mensaxes de optimismo institucional e denuncias sindicais. Mañá está prevista unha rolda de prensa de sindicatos que, a diferenza da CIG, asinaron hai anos un acordo da Xunta para baixar os cocientes, acordo cuxo cumprimento leva tempo cuestionando.