Detido o expresidente do Barça Josep Maria Bartomeu

Os Mossos d'Esquadra detiveron ao expresidente do FCBarcelona Josep Maria Bartomeu no marco da operación 'Barçagate'.  O corpo policial tamén realizou un rexistro nas oficinas do club. 

Tamén foron detidos Óscar Grau, director executivo do club, e Román Gómez Pontí, responsable dos servizos xurídicos. Non se descartan máis detencións, segundo explicou na SER Anna Punsí. 

Josep Maria Bartomeu @EP

Os axentes están a inspeccionar a sede do club azulgrana para requisar documentación sobre as contas da entidade durante a presidencia de Josep Maria Bartomeu.

En plena incerteza sobre o futuro do club tras a saída de Bartomeu, hai un 'buraco' nas contas da entidade de 271 millóns, equivalentes a un terzo dos ingresos a última tempada, a cubrir xa entre este ano e o que vén.

De acordo aos estatutos do club, a Xunta Directiva está obrigada a restituír as perdas nas que poida incorrer a institución no prazo de dous exercicios, equivalentes a cen millóns antes de impostos no exercicio 2019-2020 segundo as últimas contas presentadas polo club (nas que o proxecto de 815 millóns do novo Espai Barça, que se financiará vía bonos, non computa como débeda).

Os estatutos tamén obrigan á Xunta para manter un nivel de endebedamento neto inferior a dúas veces o Ebitda. De acordo ás últimas contas presentadas polo club, a Executiva de Bartomeu debería cancelar débeda por valor de 171 millóns esta mesma tempada (e iso segundo a interpretación que fai a propia xestión do seu volume de débeda neta).