​O Dépor colma a paciencia de Escotet (Abanca), que busca cambios e máis control de gastos

|

O club herculino, á deriva tanto deportiva como institucionalmente, ve como o seu máximo accionista, a entidade bancaria, empeza a cuestionar o gasto que lle supón


Sen Abanca, ao Deportivo da Coruña quedarían poucas opcións de supervivencia: a súa débeda ascende por encima dos 50 millóns de euros. A filial galega do grupo venezolano Banesco é o máximo accionista e, de feito, a táboa que o mantén á boia. A cuestión é canto tempo máis pode Escotet soportar a rémora dun club cando a economía global está en plena recesión?


Escotettinofernandezabancadeportivo

Escotet con xeito Fernánez, expresidente do Deportivo, nunha foto de arquivo | Foto: RC Deportivo


Como a boa parte do deportivismo, a Juan Carlos Escotet, presidente de Abanca, entidade “dona” do Deportivo da Coruña -o banco, máximo acredor do club, posúe en torno ao 80% do accionariado-, non lle saen as contas. Durante a presentación de resultados do banco onte, Escotet prometeu “cambios” despois dun ano complexo e falou de “profesionalizar” o club.


O presidente de Abanca non escondeu en ningún momento que a entidade actúa como o flotador do Deportivo, que atravesa “unha situación moito máis complexa desde o punto de vista financeiro do que é unha empresa deportiva”, segundo o relato de Escotet. De feito, Fernando Vidal, presidente do Dépor, admitiu hai uns días que, sen a lombeirada económica de Abanca, o concurso do equipo en Segunda B fose imposible. “Desaparecese en agosto”, recoñeceu.


Un capítulo, o financeiro, que Escotet tachou de “precario” e sobre o que profundará nos próximos días. As arcas do club fixeron que contratacións que parecían feitas, como a de Luís Fernández, non cristalizasen, por orde da cúpula da institución, que paralizou o acordo segundo apuntan varias informacións. Ademais, o descosido económico vén provocado en gran medida da crise de fútbol que viven os branquiazuis, un equipo polo que xa pasaron dous adestradores este curso e que cada vez ve máis afastado o soño do ascenso.


BAILE DE CADEIRAS NO PALCO?

Os cambios anunciados por Escotet ben poden ir dirixidos a un reaxuste nas contas do club, que este xaneiro fixo un esforzo por alixeirar os salarios, que con Rolan no persoal achegábanse aos catro millóns de euros, unha cifra inasumible para un club da Segunda División B. A pesar das débedas millonarias, o coruñés é o club co orzamento máis alto de todo o fútbol de bronce, o que supón estar por encima de máis dun centenar de equipos.


Con todo, cabe destacar que o Deportivo non empeza e termina nos límites de Riazor. O Deportivo Feminino, o Fabril ou ata o Deportivo Liceo seguen con atención todo o que rodea á actualidade do primeiro equipo masculino, que é o que marcará o devir de toda a entidade.


Con todo, hai outros elementos que poderían someterse a esa reestruturación. Richard Barral, director deportivo, e David Vidal, presidente, poderían estar na mira de Abanca, que esixe resultados e pide responsables. Os cambios no consello de administración só chegarán “de mutuo acordo” , se deciden non esperar á xunta de accionistas, que aínda carece de data.



En todo caso, parece que Escotet avoga por ser máis intervencionista no Deportivo, sobre o que sempre gardou unha certa distancia delegando as decisións noutras persoas. Dese intervencionismo sae David Villasuso, que foi escalando banzos nas últimas datas e postúlase para dar o salto a cotas máis altas dentro do organigrama das oficinas da praza de Pontevedra.


Tanto Barral como Vidal son nestes momentos os máis cuestionados tanto pola afección como polas altas esferas do club. A planificación do persoal, de xeito evidente desastrosa, a falta de coordinación nunha directiva novata e a incapacidade para asumir o reto de reflotar ao equipo teñen a toda a dirección na picota.   


Sen comentarios

Escribe o teu comentario




He leído y acepto la política de privacidad

No está permitido verter comentarios contrarios a la ley o injuriantes. Nos reservamos el derecho a eliminar los comentarios que consideremos fuera de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial Publicidade
Powered by Bigpress