"Cústanos manter cirurxías urxentes", alerta o xefe de cirurxía do Hospital da Coruña

O CHUAC, o hospital do SERGAS da Coruña, está xa ao bordo do colapso nalgúns dos seus servizos máis vitais. Non o din os sindicatos, senón o responsable de Cirurxía a través das canles oficiais da Xunta. O cirurxián explica que lle faltan sanitarios e material porque os teñen que dedicar a enfermos covid.

Desgraciadamente, a situación empeorará. A maioría dos contaxiados na Coruña aínda non tivo tempo de poñerse grave, como reflicten as gráficas que a diario actualiza Galiciapress.

Aínda hoxe o número de casos activos creceu en 290 na área sanitaria. Aínda hoxe o cómputo de positivos a 14 días no Concello da Coruña creceu en case 100. Por iso, o doutor suplica á xente que cumpra as normas a machada. 

Só así poderá, con sorte, manter os quirófanos funcionando. Quirófanos que por certo, hai semanas que só fan operacións urxentes e a enfermos de cancro. Nin sequera esas están garantidas se a situación segue empeorando.

O xefe do Servizo de Cirurxía Xeral do Complexo Hospitalario Universitario da Coruña (Chuac), José Noguera, lanzou á cidadanía unha petición de "auxilio" ao pedir a súa axuda para "controlar" o coronavirus facendo "caso" ás solicitudes de autoconfinamiento e ás restricións marcadas polas autoridades sanitarias.

"A día de hoxe estanos custando manter as cirurxías urxentes e oncolóxicas", sinala nun audio remitido aos medios de comunicación no que afirma tamén que xa non poden atender "as intervencións ordinarias".

"Pola cantidade de recursos humanos e materiais que temos que destinar no hospital para a atención por Covid", incide este profesional.

"Necesitamos os nosos quirófanos, camas de reanimación, anestesistas, enfermeiras, cirurxiáns e necesitámolo para atenderche", asevera na súa petición de colaboración por parte da cidadanía. "É pola túa saúde, pola dos teus familiares, pola saúde de todos", conclúe.