​“O 40-50% dos negocios de hostalería están ao bordo da quebra; estamos ante un peche encuberto”

A hostalería galega sufre coas novas medidas do Goberno, que obriga aos locais para botar a persiana ás 18 horas e con 63 municipios onde só permiten servir en terrazas ao 50% da súa capacidade.

A Asociación Hostalería Compostela atende a Galiciapress para trasladar o malestar dun sector ao bordo do KO técnico. Con axudas insuficientes dunha administración que deixa de lado á plataforma, cualifican de “ridículas” as medidas que se aplican a outros sectores mentres se castiga  aos hostaleiros. Ademais, advirten que o Xacobeo tampouco rescatará aos negocios: “Deberían destinar os recursos previstos para a promoción do Xacobeo a salvar as empresas e os postos de traballo”.

A hostalería compostelá sofre a dureza das novas restricións

As novas restricións da Xunta de Galicia supoñen a enésima estocada mortal sobre a hostalería, un sector que trata de capear o temporal no límite das súas forzas pero que navega sen vento nos seus ver desde hai moito tempo. Desde a Asociación Hostalería Compostela sinalan, en primeiro lugar, que as restricións son “inxustificadas e desproporcionadas” contra un sector xa maltratado de seu desde o inicio da crise e que agora sofre “un peche encuberto”.

A pesar de que son conscientes do aumento de casos de casos activos e do empeoramento a nivel epidemiolóxico no conxunto de Galicia, desde a hostalería din sentirse sinalados e perseguidos, sobre todo se nos detemos a analizar as restricións aplicadas sobre outros sectores.

“Todo o mundo comparte que o empeoramento coincidiu co aumento da mobilidade durante o Nadal. Pero non sei ata que punto é así se vemos as cifras da cidade de Lugo, que só se explican se alí non se celebraron as festas”, advirte Lois Lopes, directivo da organización, á vez que fai fincapé en que esa mobilidade non se fixo notar na hostalería, que pechou decembro “cunha diminución dos ingresos de entre o 70 e o 80% con respecto ao ano anterior”.

Para maior “sorpresa” do gremio, estas restricións non se estenden con igual severidade sobre outros ámbitos, como as grandes superficies comerciais ou o transporte público. “Foron un epicentro desa alta mobilidade do Nadal, pero non sofren ningunha restrición”, critica Lopes, que tacha de “ridícula” a redución horaria no peche dos comercios, que pasa das 22 horas ás 21:30 horas. “Non é nin sequera significativa como para poder atallar nada. De feito, O Corte Inglés o que fixo foi adiantar o seu horario de apertura, polo que seguen traballando o mesmo número de horas sen ningún problema”, lamenta.

Neste escenario, é evidente que as contas non saen aos empresarios. “Só coas terrazas ao 50%, ou mesmo con aforos interiores do 30% ata as 18 horas, inviabilizan unha gran parte dos negocios”, lamentan desde a asociación. Nesta liña, non dubidan en sinalar que o sector se atopa “ao bordo da quebra” a medida que as empresas se atopan sen liquidez e as débedas aumentan.

Sobre o número de negocios que non volverán abrir as súas portas desde a plataforma non se atreven a dar cifras concretas, senón que argumentan que o peche é “un proceso longo”. “Primeiro non tes liquidez, vas endebedando, adquirindo morosidade, non podes facer fronte aos pagos e finalmente chega a quebra. Consideramos que un 40 ou un 50% dos negocios están en risco de quebra, pero outra cousa é cando chegue esta quebra porque nos agarramos a cravos ardendo ata que non hai solución”, insiste Lopes. “O desenlace é fatídico: quedas sen negocio, arruinado e na maldita rúa”.

“AXUDAS QUE CHEGAN TARDE, MAL E ARRASTRO”

Onte mesmo a Xunta e representantes da hostalería propuxeron un plan de axudas para o sector cun ‘fondo de cooperación covid’. Con todo, moitos hostaleiros inciden en que aínda están a esperar moitas das axudas prometidas ao longo da pandemia para salvar os seus negocios. Isto esperta ademais o malestar dun sector que considera as restricións “improvisadas” porque esta evolución tras o Nadal “prevíase que podía pasar e aplícanse estas restricións sen ningún tipo de alternativa para nós”.

“Sobre axudas que ditou a Xunta, a responsable da xestión e dos peches, xa dixemos que non eran unha solución, senón un remedio puntual. Nós presentamos un plan de rescate que é moito máis completo que un único punto das axudas. Se ademais estas axudas chegan tarde, mal e arrastro, como é o caso da Xunta, sen responder realmente a unha análise dos negocios máis vulnerables, cunha repartición de café para todos cos fondos FEDER que supoñen unha partida moi pequena para o sector e que deixou a moita xente fose…”, relata Lopes.

A maiores, recalca que moitas destas axudas “non se cobraron”, aínda que a administración indica que se resolveron un 80% das solicitudes. “Pode ser, pero resolveron as máis pequenas, polo que unha gran parte dese diñeiro está sen executar”, estima.

Doutra banda, os hostaleiros lembran que na primeira etapa da pandemia, durante o confinamento de marzo e abril, “non houbo ningún tipo de axuda autonómica como si houbo noutros territorios”, pero que agora o Goberno de Feijóo “vanglóriase de ser os que máis axudas concederon, cando é mentira: están Asturias, Murcia, Navarra…con cantidades máis cuantiosas que as da Xunta”.

PAZO DE RAXOI E SAN CAETANO: CARA E CRUZ

A comunicación co Goberno de Galicia está, de xeito evidente, moi deteriorada ou directamente rota. “Non temos ningún tipo de relación máis aló de formar parte dunha delegación para a análise do sector pero da que a propia Xunta excluíunos unilateralmente por non ser un interlocutor amable”, censura Lopes.

A outra cara da moeda é o Concello de Santiago de Compostela, co que desde a Asociación Hostalería Compostela admiten manter “un dialogo constante”. “En Santiago fíxose un gran esforzo na repartición das axudas teniendo en cuenta a marxe de manobra e os recursos que teñen. Estivo á altura das circunstancias”, celebran sobre a xestión do goberno local encabezado por Sánchez Bugallo, que vén realizando investimentos millonarios para tratar de manter á boia ao sector.  

QUEN ATENDERÁ AOS PEREGRINOS NO XACOBEO?

Estas novas restricións supoñen un golpe máis duro aínda se cabe para os negocios santiagueses se temos en conta que nos atopamos en Ano Santo, o que prometía ser o ano do despegamento económico galego. Todo isto fixo cambiar por completo as previsións para este Xacobeo, aínda que o anuncio da Igrexa de permitir unha prórroga das celebracións ata 2022 pode ser un balón de osixeno para a economía da cidade.

Con todo, este tempo extra non permitirá recuperar o tempo perdido segundo o criterio da asociación. “Tal e como imos, con preto da metade das empresas ao bordo da quebra, teremos unha ampliación do Ano Santo practicamente sen retorno e sen capacidade de dar servizos aos visitantes”, vaticina Lopes, que ademais cre que ese 2022 será unha celebración “no medio dunha crise económica sen precedentes”.

“O intelixente sería estudar destinar os recursos previstos para a promoción do Xacobeo a salvar as empresas e os postos de traballo”, matiza a organización. Ante este escenario, nos próximos días valoran continuar coas protestas e reivindicacións que veñen realizando para visibilizar a súa situación crítica. Estas mobilizacións estarán orientadas a criticar “a falta de previsión e de axudas para o sector, que está a ser tratado dunha forma inxusta e desproporcionada comparado con outros sectores”.