Sorprendido conducindo cunha táboa o dobre de longa que o seu coche en Cambados

O infractor pilotaba un pequeno utilitario de non máis de 4 metros de longo. O taboleiro que levaba atado ao teito medía oito metros.

A Garda Civil de Tráfico interceptou na tarde do sábado, no municipio pontevedrés de Cambados, un turismo que circulaba portando un taboleiro de oito metros de longo sobre o teito.

Segundo informa a Benemérita en Pontevedra, a través das súas redes sociais, os feitos ocorreron sobre as 19,30 horas na estrada EP-9004.

Os axentes procederon a dar o alto ao coche por circular "de forma manifestamente temeraria", xa que había un "evidente risco de desprendemento" do taboleiro e podía ocasionar "perigo tanto para o condutor como para os demais usuarios da vía".

O vehículo quedou inmobilizado e o seu condutor enfróntase a unha sanción de 400 euros, engade a Garda Civil.