Os chefs Alberto Fernández, Iria Espinosa e Marco Varela poranse o delantal na LXIII Feira do Viño do Ribeiro

Queda pouco máis dun mes para alzar a copa e descorchar as botellas do viño do Ribeiro en Ribadavia, capital do viño do 1 ao 3 de maio coa celebración da LXIII Edición da Feira do Viño do Ribeiro, un dos eventos gastronómicos máis singulares do país e unha das citas indispensables non só para os amantes do bo viño, senón da cultura e a tradición de Galicia, que se dan a man no corazón dunha comarca con forma de acio e que para esta edición convocou a algúns dos mellores chefs do panorama.

SHOWCOOKINGS DE ALTURA

Despois de descubrir o seu cartel para 2026, a organización comezou co goteo de anuncios de face a esta nova edición da Feira, que contará con tres reputados profesionais das cociñas a nivel nacional, segundo confirmaron a través das súas contas de redes sociais para os seus tradicionais showcookings, á espera de descubrir todos os segredos do seu programa para esta edición.

O primeiro en sumar á festa chega desde Ermua, sendo Alberto Fernández o responsable das delicatesen do ‘Hotel Restaurante Pallabarro’, en Allariz. A Fernández é difícil non pillalo coas mans na brasa e defínese o seu estilo pola combinación de “tradición e técnica actual”, onde sempre trata de elevar o produto local en cada un dos seus pratos, tal e como fará na súa exhibición a beira do Avia.

Con Estrela Michelin reeditada chega Iria Espinosa, á fronte xunto a Luís Veira do recoñecido restaurante ‘Árbore dá Veira’, na Coruña, ademais da ‘Taberna 5 Mares’, que presume de selo Bib Gourmand. A de Monte Alto é unha das voces autorizadas da cociña galega e porase o delantal tamén en Ribadavia para sorprender coas súas propostas “desenfadas, sensibles e profundas”. 

O último en confirmar a súa presenza é Marco Varela, que xogará de local. O de Lalín é chef executivo en ‘Casa de Arman’ e podémolo atopar á fronte de ‘Sábrego’, en Ribadavia. Bebendo de titáns como Mario Sandoval ou Salvador Gallego, a súa pegada en Ribadavia é xa dabondo coñecida, aproveitando cada ocasión para regar as súas creacións cun bo viño da terra. 

Tampouco faltarán as catas, a música e as sorpresas nesta festa que un ano máis nesta festa declarada de Interese Turístico espera manter a súa tendencia e romper un ano máis a marca de visitantes á capital do viño do Ribeiro.