A vacinación en Galicia terá que esperar a mércores polo atraso da segunda remesa de Pfizer

As 18.000 unidades da vacina programadas para Galicia chegarán, pero máis tarde do esperado. Este cambio de última hora obrigou ao SERGAS ha reformular a campaña de vacinación nas residencias de maiores.

Desta forma, será o mércores cando comece a primeira fase do programa de vacinación contra a Covid-19 que promete ser o principio do fin da pandemia. 

O atraso na chegada da segunda remesa de vacinas Pfizer-BioNTech a España, con 18.000 unidades para Galicia, provocou que o Servizo Galego de Saúde (Sergas) reprogramase para o mércores a continuación da súa campaña de vacinación en residencias de maiores das sete áreas sanitarias.

Deste xeito, a Xunta recibirá a segunda entrega este martes e non este luns, tal e como estaba previsto, polo que a vacinación comezará finalmente o mércores unha vez as doses pasasen polo proceso de desconxelación.

Tras a "incidencia loxística" ocorrida en Bélxica que alegou Pfizer e que afecta a oito estados da Unión Europea, o ministro de Sanidade, Salvador Illa, xa asegurou este luns, nunha entrevista á Cadea Ser, que o problema xa está "resolvido".

Galicia, como en España e na gran maioría de países comunitarios, inoculó as primeiras vacinas este domingo na residencia Porta do Camiño de Santiago. Nieves Cabo, unha compostelá de 82 anos usuaria deste centro sociosanitario, foi a primeira en recibila.

Precisamente, este domingo o conselleiro de Sanidade, Julio García Comesaña, lembrou que a segunda remesa de Pfizer-BioNTech chegaría á Comunidade galega --inicialmente, este luns-- cun total de 18.000 unidades que se repartirían para administrarse de maneira simultánea en residencias das sete áreas sanitarias, coa previsión de que cada día cheguen a máis de 1.000 persoas.