R Cable debe devolver parte do diñeiro a un cliente por deixarlle sen os partidos de fútbol de Segunda
O Instituto Galego de Consumo emitiu unha resolución pola que a operadora de telecomunicacións R deberá abonar a un cliente unha compensación de 20 euros mensuais durante un ano (240 euros en total) por eliminar do servizo contratado a emisión dos partidos da Segunda División de fútbol (Liga Smartbank).
Un lucense gaña unha reclamación en Consumo contra a marca galega propiedade de Euskaltel. Empezou a liga vendo ao CD Lugo como parte da súa subscrición e a metade de tempada R pretendíalle cobrar 20 euros máis ao mes.
Xogadores do Lugo celebrando un gol
Diso informou a asociación de consumidores Facua Galicia, encargada de xestionar a reclamación por parte do cliente, veciño de Lugo, que contratara os servizos da operadora cunha oferta que, entre outros servizos, incluía a emisión dos partidos da categoría de prata do fútbol español. Hai que lembrar que o Lugo xoga en Segunda División.
QUERÍALLE COBRAR MÁIS A METADE DE TEMPADA
Con todo, explica a asociación, durante os primeiros meses do inicio da competición na tempada a operadora informou o seu cliente que xa non dispoñía dos dereitos de emisión dos partidos de Segunda pero ofrecíalle a opción de contratar por 19,99 euros a subscrición a unha plataforma (MiTele Plus, propiedade de Mediaset) que acababa de facerse co servizo para a súa distribución en exclusiva desta competición.Ante esta situación, o cliente solicitou unha compensación á operadora por valor dos 20 euros mensuais que custaba o paquete de partidos. Tras ser rexeitada a súa petición, acudiu a Facua, que tramitou a reclamación ante o Instituto Galego de Consumo.
"INCUMPRIMENTO CONTRACTUAL"
Finalmente, a entidade encargada da arbitraxe ha resolvido que R debe abonar a este cliente os 240 euros como compensación "por incumprimento contractual, ao excluír a prestación da canle de liga"."A teor do disposto no artigo 1.101 do Código Civil procede a compensación ao reclamante na cantidade de 20 euros ao mes durante o prazo de doce meses", sinala o laudo arbitral, segundo recolle o comunicado da asociación de consumidores.
Escribe o teu comentario