Caballero evita a confrontación con Inés Rey e céntrase en facer oposición a Feijóo e os PGE

Gonzalo Caballero esquivou de novo dar a súa opinión sobre a división existente entre os socialistas da Coruña tras o cesamento de Eva Martínez Acón no Goberno da cidade herculina. 

Caballero trasladou as cuestións relativas á tensión existente entre partidarios e contrarios á alcaldesa Inés Rey a a Secretaría de Organización do partido, ao cargo de Pablo Arangüena.

Caballero e Rey, xuntos durante a campaña

O secretario xeral do PSdeG, Gonzalo Caballero, volveu a evitar pronunciarse sobre a polémica coa alcaldesa da Coruña, Inés Rey, e o seu equipo de goberno xurdida tras o cesamento da secretaria local do PSOE herculino, Eva Martínez Acón, como membro do executivo municipal.

A preguntas dos medios este sábado, Caballero manifestou que está centrado na acción política e que as cuestións orgánicas están "delegadas" na Secretaría de Organización do partido que ocupa o deputado Pablo Arangüena.

"Coa que está a caer temos que poñer todas as responsabilidades en demandar a Feijóo que mellore a vida da xente e en sacar adiante os orzamentos (do Estado)", apuntou o secretario xeral do PSdeG.

"Esa é a axenda á que se dedica o secretario xeral", remarcou despois de afirmar que non escoitara as últimas declaracións lanzadas desde o goberno socialista da Coruña, que acusaron á dirección do PSdeG de dedicarse a atacar á alcaldesa herculina "no canto de facer oposición" ao Executivo de Alberto Núñez Feijóo.