Sorprendente resultado do cribado de coronavirus en Muros: 1.260 probas e ningún positivo

En teoría, os cribados realízanse entre grupos de poboación sobre os que se ten sospeita dunha relevante presenza de contaxiados asintomáticos. En Muros, con todo 1.259 deron negativo e unha persoa terá que repetir o test por dar indeterminado.

A práctica totalidade das probas realizadas esta fin de semana, como parte do cribado entre os veciños de Muros de 30 a 50 anos, deu negativa. Os datos facilitados polas autoridades sanitarias revelan un único caso indeterminado ao que se lle repetirá a PCR en próximos días.

A xerencia da área Sanitaria de Santiago de Compostela e O Barbanza informou a pasada semana do cribado, motivado polo incremento de casos nos que non é posible seguir a cadea epidemiolóxica.

É IMPORTANTE TER ACTUALIZDOS Os DATOS

En total, acudiron ao centro de saúde 1.260 das 1.780 persoas citadas ao longo desta fin de semana e unhas 300 persoas do rango de idade ao que estaba dirixido o cribado non puideron ser localizadas por non estar actualizados os seus datos sanitarios.

A inmensa maioría das probas deu negativo, unhas 1.259 persoas, engaden desde o Sergas. Na actualidade, a área de Santiago e Barbanza conta 1.360 casos activos --12 menos que este domingo--, e 78 pacientes con COVID-19 ingresados, 13 deles en UCI.