5 anos de cárcere para un profesor de taekwondo de Vigo por abusar sexualmente dunha alumna de 15 anos

|

A Audiencia Provincial de Pontevedra condena a cinco anos de prisión ao profesor de taekwondo que relizó tocamentos a unha alumna de 15 e interrogouna sobre a súa vida sexual.


Os maxistrados outorgaron credibilidade ao testemuño da vítima, e rexeitaron que actuase con ánimo de prexudicar ao acusado, que se defendeu alegando que eran "clases especiais".


Un adestrador de taekwondo acrobático, acusado de abusos sexuais a unha menor, na última sesión do xuízo celebrado contra el, na sección quinta da Audiencia Provincial de Pontevedra (sede en Vigo).


A sección quinta da Audiencia Provincial de Pontevedra, con sede en Vigo, condenou a 5 anos de prisión a José C., profesor de taekwondo nun club da cidade olívica, por un delito continuado de abusos sexuais a unha das súas alumnas, de 15 anos de idade.

Segundo a sentenza, o tribunal considerou probado que, en novembro de 2018, o acusado convocou á alumna a unhas "clases especiais" que terían lugar no seu domicilio, co pretexto de que debía mellorar a súa "expresividade", para progresar na disciplina de taekwondo acrobático.

Nesas clases, o profesor realizou tocamentos á nena nos peitos e na zona xenital, pediulle que se sacase o suxeitador e fíxolle preguntas de índole sexual, sobre as súas relacións con mozos ou sobre se se masturbaba. Todo iso a pesar de que a menor lle dixo que sentía incómoda e nerviosa.

Os maxistrados outorgaron credibilidade ao testemuño da vítima, e rexeitaron que actuase con ánimo de prexudicar ao acusado ou por animadversión. De feito, sinalan que a relación da nena e a súa familia con José C. era boa, e que a propia vítima mantivo a súa versión dos feitos.

Do mesmo xeito, rexeitaron o argumento esgrimido pola defensa, de que a moza actuou inducida por algúns dos seus compañeiros, que tiñan mala relación co adestrador e querían vingarse del.

A sentenza tamén reflicte que os informes periciais consideran veraz o relato da vítima, e que non é estraño que a menor quixese manter unha aparencia de normalidade na súa vida tras os abusos. Así mesmo, o tribunal sostén que as preguntas de índole sexual que o acusado fixo á nena "non tiñan ningunha xustificación".


CONDENA

No seu fallo, a Audiencia condena a 5 anos de cárcere ao acusado, por un delito continuado de abusos sexuais con prevalimiento sobre menor de 16 anos, e imponlle a prohibición de achegarse ou comunicarse coa moza durante 8 anos.

Do mesmo xeito, imponlle unha inhabilitación para exercer profesión ou actividade na que teña contacto con menores durante 8 anos, e establece que deberá indemnizar á vítima en 6.000 euros.

O tribunal rexeitou a atenuante de dilacións indebidas, e tamén a de reparación do dano porque, segundo apuntou, o acusado depositou 10.000 euros en concepto de fianza, pero non para pagar a eventual responsabilidade civil.

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial Publicidade
Powered by Bigpress