Volve estar mellor Galicia que España nesta segunda onda? Si, pese non ser das que fai máis PCR

Galicia navegou a primeira onda do coronavirus significativamente mellor que o conxunto de España. Sucede o mesmo nesta segunda onda? Corre o país o risco que as pésimas cifras de rexións como Madrid acaben trasladándose a Galicia? Para indagar estas cuestións, comparamos gráficamente os valores das principais variables.

MENOS DA METADE DE TAXA DE FALECEMENTOS

En teoría, o parámetro máis fiable para confrontar é o número de falecidos en función da poboación. En España a cifra oficial do mércores era 31.034 decesos. Cantos mortos levamos en Galicia? 721, segundo os datos do Ministerio e da Xunta.  

En Galicia faleceron 282 persoas por cada millón de habitantes. En España son 658 os mortos por millón de habitantes. 

A evolución da curva diaria de falecementos en similar, aínda que en valores logicamente diferentes. Galicia alcanzou o seu pico de fallecimentos en torno ao 10 de abril, uns 10 días despois que España. Unha semana ou máis de atraso na evolución da pandemia que aínda é pronto para saber se se está repetindo nesta segunda onda.

GALICIA, COMO IRÁN EN TAXA DE MORTES

Se Galicia fose un estado independente, colocaríase como o 26º estado do con maior mortaldade, xusto detrás de Irán. Na clasificación de mortos por millón compilada por Worldometer, España está quinta, só por detrás de San Mariño, Perú, Bélxica e Andorra.

Con todo, estas cifras hai que tomalas con prudencia. Non saberemos o verdadeiro impacto da pandemia  ata que podamos comparar as total de falecidos en 2020 coa media de falecidos nos últimos anos. 

En xuño, o Sistema de Monitoraxe da Mortalidade diaria (MoMo) do Estado estimaba que se produciron en España entre 43.000 e 44.000 mortes máis do habitual en 2020 respecto a outros anos.  Por entón, o cómputo oficial de mortos por coronavirus en España andaba polos 28.000. É dicir, posiblemente falecesen uns 14.000 españois por coronavirus que non figuraban nas estatísticas.

As provincias galegas estaban entre as que menos diferenza había entre os decesos rexistrados e os que cabería de esperar un ano normal. A Coruña sería a peor, cun 10,4% máis de óbitos rexistrados fronte aos que cabería de esperar. Unha porcentaxe relevante pero que palidece fronte a outros, polo exemplo o exceso do 135% en Madrid.

Con todas estas cifras sobre a mesa, podemos estimar que a taxa de falecementos española é máis do dobre que a galega, a pesar de que Galicia ten a poboación máis envellecida do Estado e, por tanto, a máis vulnerable. Unha vez que en 2021 podamos comparar os excesos de defuncións de 2020, o lóxico é esperar que a comparación sexa aínda máis favorable para Galicia.

Galicia, sétima autonomía de España por poboación, é a novena no total de decesos.

DIAGNÓSTICOS DE CORONAVIRUS

A comparación por casos de coronavirus é imposible de realizar cun mínimo de rigor. Debido á escaseza de test e ao carácter asintomático da enfermidade en moitos casos, sobre todo entre os máis novos, é evidente que moitísimos enfermos non foron diagnosticados. 

O propio ministro de Sanidade estimou o mércores no Congreso que na primeira onda en España só diagnosticaba 1 de cada 10 casos mentres que na segunda onda estima que diagnostica 6 ou 7 de cada 10.

Así que, asumindo estes déficits, o único que se pode comparar son os diagnósticos. A cifra oficial de España é de 693.556 casos, a de Galicia 19.930. Por tanto, España conta cuns 14.700 diagnosticados por millón de habitantes e Galicia  uns 7.400. Outra comparación favorable a Galicia, cunha taxa case a metade que a española.

En canto ao ritmo da pandemia, as dúas gráficas do acumulado de casos son moi similares. 

Parece, iso si, que lvos diagnósticos en Galicia non empezaron a repuntar significativamente ata principios de agosto, cando o conxunto de España xa levaba varias semanas sufrindo a aceleración da covid-19:

SITUACIÓN ACTUAL

Dado que agora, en teoría, non hai tanta escaseza de test, polo menos en Galicia, as comparativas de diagnósticos a curto prazo si deberían ser bastante fiables. 

De novo Galicia sae favorecida da comparación. A media en España sitúase en 286,86 casos por 100.000 habitantes (día 23 de setembro de 2020) en 14 días . En Galicia a taxa de incindencia a dúas semanas é menos da metade, 116,47. Só Asturias e a Comunidade Valenciana están mellor:

Ademais, a taxa de incidencia de Galicia leva estabilizada sobre os 115-130 casos por 100.000 habitantes cada dúas semanas desde principios de setembro. Estabilización da que non houbo ningún indicio en España ata moi recentemente, e está por ver se se consolida:

HOSPITALIZACIÓNS

A variable de hospitalizacións tamén debería ser bastante fiable. Suponse que nin en Galicia nin en España hai enfermos de coronavirus que quedan sen unha cama de hospital cando a necesitan, sobre todo agora.

Galicia é a segunda comunidade con menos porcentaxe das súas camas convencionais ocupadas por pacientes covid. A media española está en 9,21%, a cifra galega é do 3.06%, só mellorada pola asturiana. 

Algo moi similar sucede coas UCI. Aí Galicia é a mellor na clasificación autonómica, cunha ocupación do 4,4% das UCIS con enfermos de coronavirus, fronte ao 36% de Madrid ou máis do 50% na Rioxa. 

PROBAS 

Onde sae peor parada Galicia é na comparativa de probas diagnósticas. Hai 10 autonomías que realizaron máis PCRs por 1.000 habitantes que Galicia.  Iso a pesar de que o SERGAS acelerou moitísimo este mes, de facer unha media dunhas 2000 PCR a principios de agosto anda xa case nas 5.000 ao día.