Radad Covid, a app oficial contra o coronavirus, non é accesible para algunhas persoas con discapacidade

Todas as administracións teñen a obrigación legal de cumprir uns criterios de accesibilidade nas súas ferramentas informáticas. Con todo, a ferramenta máis importante de España contra o coronavirus non cumpre estes requisitos, alerta CERMI. Hai que lembrar que A Mesa pola Normalización tamén criticou hai pouco a Radar Covid, no seu caso por estar en inglés pero nin en galego nin nas outras linguas cooficiais de España.

O Comité Español de Representantes de Persoas con Discapacidade (CERMI) denunciou ante a Oficina da Atención á Discapacidade (OADIS) do ministerio de Dereitos Sociais e Axenda 2030 as "graves deficiencias" de accesibilidade da aplicación para dispositivos móbiles Radar COVID, que exclúe do seu uso a determinadas persoas con discapacidade.

Radar COVID é a aplicación oficial do Goberno de España para o rastrexo de contactos por coronavirus e púxose gratuitamente ao dispor de todas as persoas que desexan utilizala como forma de contribuír a reducir os contagios e a previr a extensión da enfermidade.

O CERMI recibíronse queixas de persoas e de organizacións da discapacidade que sinalan relevantes carencias de accesibilidade, que a converten en inutilizable para grupos específicos deste sector social.

A aplicación foi promovida pola secretaría de Estado de Dixitalización e Intelixencia Artificial do ministerio de Asuntos Económicos e Transformación Dixital e na súa realización ignoráronse inescusablemente os criterios xerais de accesibilidade universal establecidos para este tipo de solucións dixitais.

O CERMI pediu á OADIS que abra unha investigación á secretaría de Estado de Dixitalización e Intelixencia Artificial por proporcionar unha aplicación inaccesible e ínstelle a liquidar as deficiencias detectadas coa maior urxencia.

Como afirma CERMI, "non deseñar produtos tecnolóxicos accesibles vai en contra da normativa vixente e supón unha infracción legal sancionable, pero agrávase como neste caso cando a falta de accesibilidade deixa desprotexidos ou en peor situación ás persoas con discapacidade ante o impacto da pandemia causada polo coronavirus, comprometendo o seu dereito á saúde sen discriminacións".