O coronavirus dispárase na Coruña, Ferrol e Lugo e pon a Galicia en niveis de casos propios de Fase 1

|

Moi malos datos outra vez do coronavirus en Galicia. Con 141 novos positivos, a comunidade bate o seu récord desde o inicio dos rebrotes. O principal problema segue estando na Coruña onde a pandemia segue acelerando con 81 novos casos, o máximo aumento rexistrado. Agora ben, o ritmo dos ascensos é preocupante en case todas as áreas. Hoxe, especialmente en Ferrol e Lugo, que suman 9 casos activos.


A nivel galego, o número total de enfermos é 938, 111 máis que onte. Non había tantos pacientes desde o 22 de xuño, cando Galicia estaba en Fase 1.


CIFRAS DE RÉCORD DESDE O PICO

Como se produciron 30 altas, isto apunta a que onte houbo 141 positivos. O SERGAS segue sen dar esta cifra, hai que deducila, a pesar da súa relevancia para a opinión pública. Eses 141 contagios supoñen o récord en Galicia desde o pico da pandemia.


Os casos activos aumentaron onte un 13,4%. Se abrimos foco, como sempre debemos facer para analizar as tendencias, vemos que a media móbil a sete días está nun incremento diario do 12,5%. Outro indicador máis que sitúase en niveis non vistos desde primavera.





Os PCRS NON SE ESTÁN MULTIPLICANDO

O presidente da Xunta prometeu onte que se ían multiplicar os PCR, especialmente a menores de 40 anos. As cifras do propio SERGAS sementan dúbidas sobre a prometida multiplicación.


Onte o SERGAS realizou 2.667 PCRs, que son 112 máis que o día anterior. Habitualmente a Xunta viña realizando unhas 1.800 cada día, pero baixou o número de probas paulatinamente desde a semana pasada, ata alcanzar un mínimo de 1.265 o luns. 





A taxa de positividade tampouco achega boas noticias. Onte foi do 5,2% , un valor similar ao dos últimos días. Antes da aceleración do brote coruñés, a taxa roldaba o 2,4%. Hai que lembrar que a OMS fixa o 5% como valor de referencia para estimar que o virus está baixo control. 


O VIRUS SEGUE ACELERANDO NA CORUÑA

Os casos activos incrementáronse un 17% onte na Coruña. Son 81 máis, ata sumar 544. É o maior aumento de casos activos rexistrado ata a data nesa área sanitaria. 





A gráfica de casos activos que a diario actualiza Galiciapress mostra ata que punto o virus está sen control na área sanitaria da Coruña - Cee:





A media móbil a sete días do cambio diario de casos activos, o indicador que nos permite estimar mellor a tendencia da pandemia, está no 19,8% na Coruña. O seu máximo valor ata a data, o dobre que hai dúas semanas.


A pesar desta aceleración, a Xunta decidiu non confinar a comarca da Coruña, que acumula a maioría dos casos da área sanitaria e de toda Galicia. As medidas anunciadas polo presidente son tímidas, como a polémica prohibición de limitar fumar na rúa a menos de dous metros de distancia doutra persoa.


A Xunta hai días que non informa de novos brotes na Coruña, tras indicar que os coñecidos, o de Meixende-Oleiros-Arteixo e o de Vimianzo, estaban controlados. Como seguen aparecendo ducias de casos cada día, e como Sanidade está obrigada a comunicar brotes cando logra relacionar tres contagios, isto indica que o SERGAS non está a lograr establecer vínculos entre os positivos. Isto, á súa vez, apunta a unha transmisión comunitaria do coronavirus, polo menos na cidade da Coruña, a máis afectada.


Hai que lembrar que a Xunta non pechou a porta para confinar a comarca nos próximos días se a situación empeora. Mañá volve reunir o comité de expertos, a pesar de que en teoría as medidas de onte deberían ser revisadas dentro dunha semana.


LUGO E FERROL TAMÉN REXISTRAN AUMENTOS RELEVANTES


A situación nas outras áreas sanitarias tamén empeora, aínda que a un ritmo moitísimo menor que o coruñés.


Hoxe destaca o segundo aumento relevante seguido en Ferrol. Son outros 9 casos, 18 máis en só dous días, ata os 29 actuais. Varios destes positivos deberían ter que ver con el brote de COVID-19 localizado nun campamento de verán para escolares no municipio de Cerdido, onde o SERGAS descubriu 13 contagios, algúns entre menores.


En Lugo tamén aumentan os casos en 9, a pesar de que o SERGAS afirma que o brote de Castro de Rei "parece estar controlado". As cifras apóiano, acábanse de coñecer os resultados de 110 test. Todas as PCRs foron negativas, polo que seguen sendo 6 os contaxiados, traballadores temporeros que viñeron recoller amorodos.


OUTRAS ÁREAS


Os aumentos noutras áreas son máis tímidos, con dous casos activos máis en Vigo, 6 en Pontevedra e 6 en Ourense. Os da Capital das Burgas poden ter que ver con un pequeno novo brote familiar na cidade descuberto hai dous días.


A única boa noticia de hoxe achégaa Santiago. Os casos activos alí redúcense ata 43, dous menos. Pese ao atractivo turístico da capital de Galicia e do Barbanza, parece que está a levar os rebrotes mellor que outras áreas. Hai que ter en conta, ademais, que parte deses 43 casos activos proveñen de o Centro Superior de Hostalería, cuxa residencia serve de residencia provisional para persoas en corentena que non teñen onde aloxarse.


Dos 938 casos activos, 544 corresponden á área da Coruña e Cee --81 máis que este mércores--; 93 á de Lugo --nove máis--; 118 á de Vigo --dúas máis--, 51 á de Pontevedra e O Salnés --seis máis--; 60 á de Ourense --seis máis--; 43 á de Santiago --dúas menos-- e 29 á de Ferrol --nove máis--.




HOSPITALIZADOS E FALECIDOS


Sanidade indica que, ata o momento, curáronse en Galicia 11.506 persoas, 30 máis que a xornada anterior, e faleceron 623 pacientes con COVID. A última vítima mortal notificada foi un home de 90 anos falecido en Ourense relacionado cun brote en Vilar de Barrio.

Dos 938 casos activos na Comunidade galega, cinco están vinculados a centros residenciais, tres corresponden a usuarios e dous a traballadores.


Do total de pacientes positivos, 40 permanecen en unidades de hospitalización convencional --cinco máis que este mércores-- e un na UCI --dúas menos--, mentres que 897 atópanse en seguimento domiciliario --108 máis respecto a a xornada pasada--.


O número de PCR realizadas ata a data na Comunidade galega ascende a 272.115 fronte ás 269.448 rexistradas ata este mércores, indicou Sanidade. 



X5qx6 casos activos de coronavirus en galicia media m vil a 7 d as





Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial Publicidade
Powered by Bigpress