​O Valencia ameaza con volver pescar no Celta, un caladoiro para o club che

O club valenciano tentará roubar dúas pezas ao Celta de Vigo este verán, a pesar de que os seus obxectivos son dous xogadores importantes no club.

Wass, Maxi Gómez, Yoel, Roncaglia, Santi Mina… moitos foron os exemplos nos últimos anos que demostran a existencia dunha ponte aérea entre o Celta de Vigo e o Valencia Cf. Estes son só os máis recentes dunha lista na que Karpin, Cañizares ou David Silva son algúns dos nomes máis ilustres que vestiron as zamarras dos dous equipos. Con todo, parece que a dirección sempre adoita ser de Balaídos a Mestalla e en poucas ocasións dáse o camiño inverso. Os casos máis soados talvez sexan os de Mazinho, que rendeu a un nivel altísimo na ría de Vigo e non así a beiras do Turia, ou Santi Mina, que se foi e volveu en cuestión duns catro anos. Agora, os morcegos ameazan con botar as súas redes outra vez sobre xogadores celestes.

DOUS OBXECTIVOS EN GALICIA

Nesta ocasión o club valencianista viría con dous obxectivos. O primeiro Néstor Araujo, puntal da zaga celtiña e polo que suspira Peter Lim. A mala tempada do Valencia, sobre todo no aspecto defensivo, e a saída de Garay, levaron os ollos da entidade sobre o central azteca, que non vería con malos ollos enrolarse nas filas do cadro che.

En Vigo tampouco ven desatinada a súa saída se a oferta é boa, e esta podería roldar os 20 millóns -a metade da súa cláusula-, aínda que nos primeiros contactos o Valencia ofrece máis ou menos a metade desa cifra. Con Aidoo e Murillo, cun pé e medio en Vigo, os celestes cren que os postos titulares están cubertos, polo que investirían ese diñeiro noutros xogadores de futuro.

O outro obxecto de desexo é Brais Méndez, unha operación que se antolla un pouco máis complicada. En Vigo non terminan de ver a súa marcha, xa que cren que pola súa mocidade e rol aínda pode ter percorrido no club. Ademais, a súa condición de internacional podería encarecer o trato e no Valencia, aínda que xa sondaron a contorna, non parecen consideralo un xogador prioritario, a non ser que cheguen ofertas por Rodrigo e Ferran, que foi relacionado co City recentemente.

A favor do Valencia xoga o tempo: Brais termina contrato en 2021. Doutra banda, este tampouco foi o seu mellor ano, e esta podería ser a última oportunidade dos celestes de sacar tallada por un xogador que, se nada o remedia, deixaría o club a custo cero nunha tempada. Veremos que ocorre ao longo deste verán, que terá de novo ao Celta e ao Valencia botando un pulsito.