Morre un home tras a picadura dunha avespa velutina en Santiago

A corentena atrasou a eliminación de niños de velutina xusto na época na que a especie invasora empeza a contruirlos, polo que é probable que este ano se expanda

Un home de 54 anos de idade faleceu este domingo pasado despois de sufrir a picadura dunha avespa velutina na contorna da súa vivenda na parroquia de Villestro en Santiago de Compostela.

Vespa velutina atacando abella nunha foto de Danel Solabarrieta publicada na súa Flickr baixo licenza Creative Commons

Segundo os datos facilitados polo 112 Galicia a Europa Press, os feitos sucederon sobre as 11,25 horas deste domingo no lugar de Reborido, na parroquia compostelá de Villestro.

Ao lugar o 061 enviou unha ambulancia de soporte vital avanzado para asistir ao home D.G.D., de 54 anos, ao que practicaron manobras de reanimación cardiopulmonar, pero finalmente o home faleceu no lugar, confirmaron fontes sanitarias.