Gráficas áreas sanitarias: continúa o aumento de casos en Vigo e Santiago, con estabilidade no resto de áreas galegas

A pesar de que Galicia ten a luz verde de Moncloa para pasar á fase 1 este luns 11 de maio, os datos do SERGAS seguen sendo, canto menos, preocupantes nalgunhas áreas, que seguen retrocedendo na súa carreira cara á normalidade.

Vigo suma xa varios días de subidas e baixadas, aínda que fontes do SERGAS consultadas por este medio achacan os altibaixos desta semana a un "problema informático" que, aínda que dicían ter localizado, parece que aínda segue reflectíndose nas cifras oficiais. Mentres, en Santiago de Compostela a situación parece tamén descontrolada, con 30 novos casos nas últimas 24 horas e coas peores cifras totais desde o 30 de abril. 

A situación na área da capital, que viña ofrecendo unha baixada progresiva ata o martes, preocupa tanto ou máis como o escenario da área da cidade olívica, aínda que esta só viu aumentada a súa cifra en once novos positivos no último día. Con todo, na área segue pesando moito o  gran salto sufrido o mércores, que la EOXI de Vigo encargouse de desmentir asegurando que se debían a falsos positivos. 

Con todo o certo é que tres xornadas despois de o desmentido dos seus propios datos-que se fixo verbalmente a Galiciapress e outros medios- o SERGAS segue sen corrixir as súas cifras publicadas para Vigo, o que non suscita confianza precisamente, pois en teoría era simplemente un "erro informático".

Pontevedra é a terceira área que hoxe ofrece malos datos, aínda que nesta zona si podemos falar dun lixeiro repunte do número de casos, que se podería xustificar polo aumento no número de test. Son cinco positivos máis con respecto a onte. 

ÁREAS CON MENOS PROBLEMAS

O resto de áreas galegas si parecen avanzar con paso firme cara á fase 1. A Coruña, a máis castigada de todas ata esta semana, viu corrixido o repunte que sufriu onte, e hoxe perde unha quincena de casos. 

Mentres, a área de Ourense rebaixa a súa cifra en seis positivos menos. Ferrol, pola súa banda, decrece en tres casos nas últimas 24 horas. Tanto a área auriense como a da cidade departamental han mantido un descenso constante desde o 29 de abril, momento no que a Xunta comezou a aplicar a súa nova metodoloxía. Ata o de agora non sufriron nin un só repunte. Lugo, en cambio, si viu aumentadas as súas cifras os días 4 e 7 de maio, aínda que foron repuntes dun e catro casos e hoxe perdeu un positivo nas súas cifras con respecto a onte. 

O 28 DE ABRIL A Xunta CAMBIOU A FORMA DE CONTAR

As gráficas por áreas sanitarias de Galiciapress só mostran datos desde o 29 de abril. O 28 de abril o SERGAS cambiou a súa forma de contar, o que fai incomparables as cifras de antes e despois. 

Con todo, velaquí a gráfica por áreas ata ese 28 de abril que a Xunta aplicou a metodoloxía que marca o Ministerio e que xa aplicaban o resto de autonomías:

O número de casos activos de coronavirus en Galicia este sábado 9 de maio é de 2.758. Por áreas sanitarias, 650 pertencen á área de A Coruña, 166 de Lugo, 426 de Ourense, 147 de Pontevedra, 753 de Vigo, 500 de Santiago e 115 de Ferrol, segundo as cifras do SERGAS.