Sáltase o confinamento para roubar colmeas en Moaña e píllao a Garda Civil

A Garda Civil investiga penalmente a un veciño de Moaña que se saltou o confinamento para, presuntamente, furtar varias colmeas nun monte veciñal de Meira, no mesmo municipio pontevedrés.

Segundo informaron os axentes, os feitos ocorreron o pasado día 27, cando unha patrulla do Seprona interceptou a unha furgoneta que se desprazaba polas pistas da zona forestal denominada 'A Cerradiña', situada en terreos da mancomunidade de montes da parroquia de Meira.

Ao inspeccionar o vehículo, os axentes comprobaron que o home levaba os compoñentes de varias colmeas que foran subtraídas nunha explotación apícola situada a escasa distancia, no mesmo paraxe forestal. As colmeas foron identificadas e recoñecidas posteriormente polo propietario da explotación, que aínda non tiña noticia da subtracción.

O condutor da furgoneta resultou ser un veciño de Moaña, de 41 anos, ao que se lle notificou a súa condición de investigado como suposto autor dun delito de furto. Tamén foi denunciado por vía administrativa por non respectar as restricións de mobilidade previstas polo estado de alarma.