Axudas para as empresas que reorienten a súa produción a material contra o coronavirus

De imprimir grandes carteis a producir pantallas. Esta é o cambio executado en Arlit para capear a crise. A Xunta quere que máis empresas sigan este camiño, polo que lanza un programa de subvencións. 

O presidente da Xunta, Alberto Núñez Feijóo, visitou este xoves en Silleda (Pontevedra) a empresa Arlit, dedicada á impresión en gran formato sobre distintos tipos de superficie e que, ante a actual situación, reorientou a súa actividade e empezou a producir pantallas protectoras faciais, das que xa entregou máis de 30.000 unidades ao Servizo Galego de Saúde (Sergas).

Precisamente, a Xunta activou nesta mesma xornada, mediante a súa publicación no Diario Oficial de Galicia (DOG), unha consulta ao tecido produtivo galego destinada a coñecer a dispoñibilidade das pemes galegas para acometer a fabricación de produtos que sirvan para combater o COVID-19.

O seu resultados permitirán pechar o deseño dunha nova liña de axudas que o Goberno galego activará nos próximos días para impulsar a produción en Galicia de medicamentos, tratamentos e equipamentos hospitalarias e médicas, entre outros bens destinados ao uso de persoal sanitario, de traballadores e da poboación en xeral.

A partir deste venres e ata o vindeiro mércores 29 de abril, as pemes galegas poderán comunicar, de maneira telemática, os proxectos que poderían acometer para a fabricación deste tipo de produtos e as súas características, así como as suxerencias que consideran oportunas para incorporar na liña de apoios que se vai a activar proximamente.

PRODUCIÓN DE MEDICAMENTOS E OUTROS
En concreto, o novo programa impulsará a produción por parte das empresas galegas de medicamentos --incluídas as vacinas-- e tratamentos contra o COVID-19, produtos intermedios, ingredientes farmacéuticos activos e materias primas necesarias para a súa elaboración.

Tamén produtos sanitarios, equipos hospitalarios e médicos --incluídos respiradores, roupa e equipos de protección e ferramentas de diagnóstico--, e as materias primas necesarias; desinfectantes; e ferramentas de recollida e/ou tratamento de datos. As axudas previstas poderán alcanzar ata 800.000 euros.

APOIOS PARA REORGANIZAR A PRODUCIÓN
Esta iniciativa súmase á convocatoria xa aberta para impulsar a reorganización produtiva das empresas galegas para facer fronte á emerxencia sanitaria, dotada con 2,5 millóns de euros.

As axudas, de ata 100.000 euros e destinadas a pemes e autónomos, cubrirán o 75% dos investimentos e gastos que realicen as empresas para adaptar a súa produción á fabricación de diversos materiais, entre eles téxtiles sanitarios, equipos de protección individual, kits e consumibles de diagnoses, así como alcois e desinfectantes sanitarios.

Os proxectos que opten ás axudas terán que propoñer a subministración dunha primeira remesa de produtos antes do 30 de xuño e ser validados polo Comité de fabricación de equipamento sanitario, impulsado pola Xunta para xestionar a oferta e a demanda de subministración de equipamento, que a través da plataforma online Marketplace reúne xa as ofertas dun centenar de empresas.

Entre elas, está a empresa que, con máis de 20 anos de experiencia, visitou o presidente da Xunta.