Coronavirus: A ministra de Traballo Yolanda Díaz chama a parar as empresas se hai risco para a saúde

O Goberno publica  unha Guía para a Actuación no Ámbito Laboral (consultar ao final desta noticia) para orientar a empregadores e operarios na presente crise polo COVID-19. 

A ministra de Traballo e Economía Social, Yolanda Díaz, xustificou este mércores a posibilidade de parar a actividade nas empresas se existe risco de contaxio por coronavirus, sinalando que se trata dunha medida guiada por "un único propósito", o de "a prevención da saúde", e que "para unha democracia este é o ben principal".

"Os demais bens están suxeitos ao principal, que é controlar os riscos, que non existan contagios e actuar como estamos a facer", explicou ante os medios de comunicación, que lle preguntaron pola guía de actuación lanzada polo seu departamento con recomendacións sobre como actuar ante o brote de coronavirus.

PAROS SE O DECIDEN OS TRABALLADORES
O documento lembra que, de acordo coa Lei de Prevención de Riscos Laborais, ante unha posible exposición a un risco grave e inminente, as empresas deben informar o antes posible e adoptar medidas necesarias para interromper a actividade e, se fose necesario, abandonar de inmediato o lugar de traballo.

Neste sentido, a guía sinala que os propios traballadores, a través da súa representación unitaria ou os delegados de prevención, poden acordar a paralización da actividade dos traballadores polo risco de contaxio, unha posibilidade que corroborou Díaz na súa declaración. "Poden tanto a parte empresarial como os propios traballadores", dixo a ministra, lembrando tamén que "hai tipos penais que abordan esta situación en caso de incumprimento".

UNHA MEDIDA "EXTREMA": "ESPEREMOS QUE NON TEÑA QUE DARSE"
A titular de Traballo quixo deixar claro que o disposto na guía non fai máis que recoller o establecido na propia lexislación laboral e que o seu propósito con este documento é "dar absoluta tranquilidade aos traballadores" e facilitar "todas as canles para prever as situacións que puidesen darse".

"O Goberno, co ministro de Sanidade (Salvador Illa) á cabeza, está a actuar correctamente e, por tanto, non aceleremos riscos que, a día de hoxe, parece que non existen", apostilou a ministra, que sinalou o posible paro da actividade como "quizais" a medida "máis extrema" e que, antes de chegar a ela, "hai outras moitas". "Esperemos que non teña que chegar a aplicarse", dixo.