Novas conexións aéreas desde o Aeroporto de Peinador en Vigo a Alacante e Canarias

O alcalde Abel Caballero adianta os novos roteiros e asegura que terán "custo cero" para as arcas municipais

A aerolínea Air Nostrum ampliará a súa oferta desde o aeroporto vigués de Peinador con voos a Alacante, As Palmas Forteventura e Lanzarote, e reforzará as conexións a Valencia e As Palmas, segundo avanzou en rolda de prensa este venres o alcalde, Abel Caballero.

O rexedor, quen precisou que estes novos voos terán "custo cero" para as arcas municipais, detallou que Air Nostrum unirá Vigo e Alacante entre o 29 de marzo e o 17 xullo, e do 6 de setembro ao 24 de outubro, cunha frecuencia de tres voos semanais.

Así mesmo, haberá voos a Las Palmas de Gran Canaria (onde xa voa Binter desde Vigo) que se operarán os sábados e os voos a Valencia reforzaranse, nese período de tempo, con conexións todos os días da semana, excepto os mércores.

Adicionalmente, nas seis semanas centrais do verán, haberá un voo a Lanzarote os xoves, a Forteventura os luns e os venres, e engadiranse voos a Alacante os mércores e sábados.