Case 20.000 fogares galegos seguen sen luz a causa do temporal

Uns 17.000 fogares galegos, sobre todo na provincia de Ourense, continúan con problemas na subministración eléctrica por mor das incidencias derivadas do temporal 'Fabien', que afecta desde o sábado á comunidade, e que se suman ás do 'Elsa' os días pasados.

Segundo informaron a Europa Press fontes de Naturgy, os cortes na subministración eléctrica afectan a última hora do domingo a uns 17.000 clientes, unha cifra significativamente inferior aos 60.000 que non tiñan luz a media mañá. Durante a noite, os efectos do temporal chegaron a deixar a 78.000 fogares sen electricidade.

A situación viuse especialmente afectada polos fortes ventos que sopraron en toda Galicia ao longo deste sábado e mesmo o domingo, onde están a ser especialmente virulentos na provincia de Ourense.

Por provincias, esta tarde a máis afectada é a de Ourense, onde están sen luz uns 8.500 usuarios. Así mesmo, tamén hai afectados uns 3.500 fogares en Pontevedra, 2.500 na Coruña e 2.500 en Lugo.

SERVIZOS DESPREGADOS
As brigadas, operadores de rede e plataforma telefónica de UFD, distribuidora eléctrica de Naturgy, seguen traballando sen descanso na resolución das incidencias que provocou o paso do temporal 'Fabien'. Na maior parte, foron causadas pola caída de árbores, ramas e cortizas sobre as liñas.

Para atender aos fogares afectados e recuperar canto antes a normalidade, UFD mobilizou ao redor de 600 persoas entre brigadas, operadores de rede e da plataforma telefónica.

O despregamento de UFD inclúe máis de 170 vehículos, 45 camións e 130 electrógenos co fin de axilizar a reposición da subministración eléctrica. Estes servizos supoñen un reforzo de equipos para atender as incidencias desta fin de semana.

Ademais, este domingo incorporáronse dous helicópteros para apoiar ás brigadas que traballan, fundamentalmente, nas zonas montañosas das provincias de Lugo e Ourense, as de máis difícil acceso.

Mentres duren as condicións meteorolóxicas adversas, o subministrador continuará cos seus dispositivos despregados e atenderá todos os problemas ata que se normalice a rede de distribución eléctrica, garantiron.