Un coche calcinado por completo en Rande provocou grandes atascos na AP9 (Vídeo)

O tráfico recuperou a normalidade máis dunha hora despois do incidente que, a pesar do espectacular, non causou danos persoais.

Un incendio calcinou por completo un turismo cando circulaba pola autoestrada AP-9 ao seu paso pola ponte de Rande, no termo municipal de Moaña (Pontevedra), sen causar danos persoais, pero si retencións á primeira hora da mañá.

Así o informou o 112 Galicia, que indicou que varios particulares alertaron, sobre as 7,30 horas deste martes, de que un coche ardía na calzada, nun dos carrís da ponte en dirección a Vigo e Tui.

En concreto, este incidente tivo lugar á altura da ponte de Rande, no punto quilométrico 146 da AP-9, en dirección á cidade olívica.

SEN DANOS PERSOAIS

O sinistro provocou retencións na autoestrada durante unha hora aproximadamente. Os particulares que alertaron ao 112, ademais concretaron que os ocupantes do automóbil afectado atopábanse fóra do turismo.

Con esta información, os xestores do 112 Galicia puxeron os feitos en coñecemento dos Bombeiros do Morrazo e de Vigo. Unha vez no lugar dos feitos, os membros do Servizo de Prevención Extinción de Incendios e Salvamento confirmaron que o turismo quedou totalmente calcinado.

Para restablecer as condicións de seguridade na vía, por parte do 112 Galicia solicitouse a colaboración dos axentes da Garda Civil de Tráfico e da Policía local, ademais do persoal de mantemento da estrada.