Alguén dixo que “todos ao nacer xa sabemos chorar, necesitamos aprender a rir”, e non lle faltaba razón. A algúns, o paso do tempo non foi capaz de arrincarlle un pequeno sorriso e o sentido de humor non forma parte do seu ADN. Máis dun exclama que nestes tempos que corren non é para estar riseiro, craso erro; con sentido do humor dixírense mellor os problemas. A política española -incluída a catalá- non está para botar foguetes e esperar que non caian encima ou lle exploten nas mans, pero sempre hai esperanza de que as cousas cambien para mellor?

A editorial Bruguera alegrounos o día coa noticia de que editará un novo número de Mortadelo e Filemón, que tan bos momentos regalaron a millóns de nenos e maiores, que leron as súas historias ao longo de anos.

A nova aventura da parella estará dedicada ás festas de Nadal, algo que non se fixo ata o de agora. É unha maneira de animar estas datas coas aventuras e desventuras dos dous personaxes e outros que todos coñecen como Ofelia, o Super, o profesor Bacterio e demais.

Na T.I.A. vai vivir o ambiente do Nadal a lume de biqueira e os axentes máis “habilidosos” vivirán intensamente todas e cada unha destas datas. Haberá que esperar só uns días para alegrar aos seus habituais lectores, porque como adoita dicir Alfonso Ussía “onde hai sentido do humor non hai dogma”.

O que está a suceder na política é digno de ser investigado polos axentes da T.I.A., onde o seu traballo podería contribuír a que cheguen a pactos para quitar dunha vez a mala uva que sementaron na cidadanía. A máis dun viríalle como anel ao dedo unha expresión que adoitan utilizar os mellores investigadores da axencia: “es un merluzo”, frase xa en desuso que define moi ben a determinados personaxes que son auténticos fanáticos ata o punto de comparar a España con China niso da democracia e a liberdade de expresión. Pura contradición, porque quen afirma iso son os mesmos que desexaron a ese país “colaboración” economíca para a historieta da República Catalá. Amos Oz, o escrito hebreo contemporáneo máis importante explicaba: “Non vin a un fanático con sentido do humor, nin a ninguén con sentido do humor que sexa un fanático”.

Á espera de novos elementos que indiquen que é posible investir a Sánchez como presidente do Goberno, cousa bastante complicada ata hoxe, o que si é seguro é que Mortadelo e Filemón van estar nos quiosco para facer vivir en primeira persoa todas as súas aventuras que non van deixar indiferentes a ningún. Coa seguridade de que unha vez máis non van defraudar a ningún dos seus seguidores, todo o contrario do que sucede na política, porque o humor é un ansiolítico para non derrubarnos. Menos mal que agora teremos a Mortadelo e Filemón!