Como estaba previsto -con filtración de sentenza o domingo- o Supremo fixo pública a súa decisión, coas penas que xa todos coñecen. A filtración dalgúns datos da mesma puxo xa en alerta ás institucións e movementos sociais, entre eles ao presidente da Generalitat, que pedía saír ás rúas pacificamente para protestar. A súa ‘proclama’ é considerada como unha actitude irresponsable dun gobernante. Quen controla que os manifestantes sexan pacíficos? Tal e como se quentaron os ánimos ninguén pode asegurar que iso sexa así.

As sentenzas, como demócratas, hai que acatalas aínda que non gusten. Se non se está de acordo coa mesma, hai vías para recorrela ata chegar ao final de todos os recursos. Dicir que non é xusta porque non foron absoltos os xulgados é pensar que a xustiza é como ir a un restaurante e pedir á carta o menú que a un non lle apetece nese momento. Nada máis lonxe, é algo máis serio, hai que respectalo.

Cando aínda non se leu con detemento a sentenza -que deixa varias portas abertas- a incompetencia fai que se aproveite a conxuntura para seguir manipulando a uns cidadáns que se creron desde o primeiro día o relato que sabían de antemán que non era posible.

As competencias de prisións que están transferidas á Generalitat teñen nestes momentos nas súas mans a decisión de definir que réxime dos existentes van aplicar aos líderes independentistas, sen esquecer o papel tan importante que van xogar as Xuntas de Tratamento

O que está bastante claro -polo menos nestes tempos electorais- é que non haberá indulto, pero como é máis que evidente, os beneficios penais van ser importantes. É cuestión de tempo, pouco.

Xa saíron as distintas formacións independentistas a pronunciarse sobre a sentenza, co seu discurso de sempre: sentenza inxusta, falta de liberdade, democracia e opresión do Estado e a xustiza e tamén chamaron á cidadanía para saír á rúa como resposta á sentenza.

Como era de esperar e despois de que o ‘seny’ do que sempre se fixo gala en Catalunya pasou a peor vida, a mecha foi acendida polos que levaron a esta situación de división na sociedade catalá: marcha de industrias, sanidade en situación máis que preocupante. Quizais do que se trata é de canto peor, mellor para os réditos políticos traducidos en votos en plena campaña electoral.

Esperemos que todas estas manifestacións que veñen convocando hai días non teña consecuencias que todos podamos chegar a lamentar.