A investidura máis preto ao renunciar Iglesias a entrar no Goberno
O líder de Podemos dará un paso ao carón se non hai máis vetos a membros da súa formación e a presenza de Unidas Podemos no Consello de Ministros é proporcional.
O líder de Podemos, Pablo Iglesias, anunciou este venres que renuncia a formar parte dun Goberno de coalición liderado por Pedro Sánchez se non hai máis vetos a membros da súa formación e a presenza de Unidas Podemos no Consello de Ministros é proporcional.
"Non debo ser a escusa do PSOE para que non haxa un goberno de coalición de esquerdas. Estar ou non no Consello de Ministros non será un problema a condición de que non haxa máis vetos e a presenza de Unidas Podemos no Goberno sexa proporcional aos votos", escribiu Iglesias na súa conta de Twitter.
Ademais, difundiu nun vídeo no que detalla a súa disposición para botarse ao carón pero subliña que os nomes do seu partido no Executivo de coalición elixiraos, "loxicamente", a súa formación.
Tamén puntualiza que transmitiu esta posición a Pedro Sánchez e que encargou ao responsable do comité negociador de pactos, Pablo Echenique, que traslade ao PSOE a súa "vontade de negociar xa un goberno de coalición de esquerdas" e "un acordo integral", con programa e equipos, "para sacar adiante a investidura a semana que vén".
"España necesita xa un goberno de coalición de esquerdas que asuma que os dereitos sociais deben ser o eixo de goberno. O PSOE di que o único escollo que evita ese goberno son eu, estiven reflexionando estes días e non vou ser a escusa para que o PSOE evite ese goberno de coalición", sinalou Iglesias.
Este é o primeiro movemento do líder de Podemos despois de que Pedro Sánchez afirmase este xoves que está disposto a incorporar a Unidas Podemos nun executivo de coalición, sempre que nel non estea Pablo Iglesias.
Este venres, tanto a vicesecretaria xeral do PSOE, Adriana Lastra, como a portavoz do Goberno en funcións, Isabel Celaá, deixaron aberta a porta a que entren nese executivo outros membros da dirección de Unidas Podemos, como a portavoz parlamentaria, Irene Montero ou o dirixente Rafael Mayoral.
"PRIMEIRO PROGRAMA"
O presidente do Goberno en funcións, Pedro Sánchez, respondeu á mensaxe emitida por Pablo Iglesias esta tarde.
Sánchez considera que hai que "empezar a negociación polos contidos: primeiro programa e logo Goberno". "Sen vetos nin imposicións podemos chegar a un acordo", indican fontes socialistas. Así mesmo, resalta que escoitará as propostas e decidirá o equipo.
Escribe o teu comentario