Furtivo con torpedo submarino detido por coller percebes sen permiso

Ata 10 quilómetros baixo o mar podía navegar un reincidente nas súas xornadas furtivas, nas que capturaba percebes por valor de ata 5.000 euros

Axentes da Policía Autonómica detiveron a un individuo por extraer de forma ilegal percebes, na zona comprendida entre Barrañán e o Porto exterior da Coruña, que utilizaba un torpedo para desprazarse varios quilómetros baixo a auga e evitar así ser localizado.

O detido empregaba un equipo de submarinismo profesional e un torpedo co que podía chegar ata a dez quilómetros baixo a auga. Cando alcanzaba a zona escollida, fondeaba o torpedo e comezaba a extracción.

Unha vez que conseguía a cantidade desexada, regresaba baixa a auga ao momento de partida. Tomaba tamén outras precaucións, como deixar fondeado o produciu recollido ata ter a certeza de que non podía ser localizado, para o que contaba coa axuda dunha muller, que tamén foi detida na operación.

ALTO RENDEMENTO DA ACTIVIDADE FURTIVA
Calcúlase que nunha xornada de traballo podía obter entre 3.000 e 5.000 euros de beneficio. No momento da detención, incautáronselle 44 quilos de percebe de gran tamaño que na lonxa poderían alcanzar un valor de 5.200 euros.

Tamén se lle interveu un coche, un equipo completo de submarinismo e o torpedo que usaba para desprazarse, así como varios útiles para a extracción e limpeza do molusco, desde unha áncora ata redes ou unha lanterna.

Os percebes foron entregados á Residencia Pai Rubinos. Ao individuo, que era coñecido por ser un furtivo habitual na zona da Coruña, impútaselle un delito contra a flora e a fauna pola extracción ilegal de percebe. As dilixencias foron remitidas ao xulgado de Garda da Coruña.